Qazaqstanda energetıka taqyrybyn qaýzaıtyn jýrnalısterdiń pýly jasaqtalady

ASTANA. QazAqparat - Elordada qazaqstandyq MedıaAlıans (QMA) ókilderiniń, respýblıkalyq BAQ jetekshileri men blogerlerdiń QR Energetıka mınıstrliginiń basshylyǵymen - mınıstr Qanat Bozymbaevpen, vıtse-mınıstrler Baqytjan Jaqsalıev, Maǵzum Myrzaǵalıev pen Bolat Aqsholaqovpen kezdesýi ótti.

Kezdesýge medıaqaýymdastyq atynan QMA basqarma tóraǵasy, «Forbs-Qazaqstan» jýrnalynyń basshysy Armanjan Baıtasov, QMA atqarýshy dırektory Vıktor Kııanıtsa, QR Prezıdenti teleradıokesheniniń dırektory Erlan Bekqojın, jýrnalıst, bloger Arman Shýraev, «Túrkistan» gazetiniń bas redaktory Shamshıdın Pátteev, «Alash Medıa Grýpp» medıaholdınginiń bas dırektory Batyr Qazybaev, «31 kanal» TRK bas prodıýseri Nurjan Muhamedjanova, «Astana» telearnasynyń bas dırektory Lıazzat Tanysbaı, «Atameken Business Channel» telearnasynyń bas dırektory Qanat Saharııanov, «Habar» Agenttigi» AQ basqarma tóraıymy Almagúl Ahmetjanova, «Jas alash» bas redaktory Rýslan Erbota, «Vremıa» qoǵamdyq-saıası gazetiniń bas redaktory Lev Tarakov, «QazAqparat» Halyqaralyq aqparat agenttiginiń bas dırektory Asqar Ýmarov, «Nur.kz ınternet-portaly» JShS bas dırektory Qýat Bahrıdınov qatysty.

Armanjan Baıtasov kezdesýdiń basty maqsattarynyń biri qazaqstandyq medıaqaýymdastyqtyń memlekettik bılik organdarymen ózara túsinistik pen tıimdi ózara qarym-qatynas ornatý ekenin atap ótti.

Óz kezeginde mınıstr Qanat Bozymbaev BAQ pen PR-qurylym qyzmetkerleriniń kásibı deńgeıin arttyrý, sapaly jýrnalıstik salany damytý boıynsha arnaıy kýrstar uıymdastyrý ıdeıasyn usyndy.

"Munyń barlyǵy jýrnalıstermen tikeleı júıeli, naqty jumysty talap etedi. Olardyń kásibı bilim kókjıegin keńeıtip, qandaı da bir salaǵa beıimdeý kerek. Munda kúrdeli ári kóp qyrly energetıka taqyrybyn jazýdaǵy bilim men obektıvtilikti kóterýdi aıtyp otyrmyn", - dedi mınıstr.

MedıaAlıans atalǵan taqyrypqa mamandanǵan biliktiligi joǵary jýrnalısterden mobıldi "energetıkalyq pýl" qurýda kómek kórsetýge daıyn ekendikterin málimdedi.

Sonymen birge, taraptar energetıka salasyndaǵy strategııalyq mańyzy bar iri nysandarǵa keńeıtilgen press-týr uıymdastyrýǵa, onda 2-3 kúndik oqytý semınarlaryn ótkizýge ýaǵdalasty. Mundaǵy maqsat - "mınıstrlik pýl" úmitkerlerin iriktep alý, oqytý jáne tájirıbede shyńdaý.

Kezdesý barysynda Q. Bozymbaev pen A. Baıtasov qatysýshylarmen energetıka, munaı-gaz taqyrybynda baspa jáne elektrondy BAQ jýrnalısteri arasynda respýblıkalyq shyǵarmashylyq jumystar baıqaýyn uıymdastyrý men ony ótkizý bastamasyn talqylady.