Qazaqstanda Endokrınologııa jáne endokrınologııalyq hırýrgııa ulttyq ǵylymı-zertteý ortalyǵyn qurý qajet - senator N.Joldasbaeva
ASTANA. Qazannyń 13-i. QazAqparat /Arman Asqarov/ - Qazaqstanda Endokrınologııa jáne endokrınologııalyq hırýrgııa boıynsha ulttyq ǵylymı-zertteý ortalyǵyn qurý qajet.
Bul týraly búgin Astanada qant dıabeti máselelerine arnalǵan forýmda QR Parlamenti Senatynyń depýtaty, Ekonomıkalyq jáne óńirlik saıasat komıtetiniń tóraıymy Nurlyǵaıym Joldasbaeva aıtty.
«Búgingi tańda álem boıynsha qant dıabeti jáne basqa da endokrınologııalyq aýrýlarǵa dýshar bolǵan azamattardyń sany ósip keledi. Qazaqstanda bul kórsetkish jyl saıyn 8 paıyzǵa, ıaǵnı 20 myń adamǵa artyp otyrady. Qant dıabetinen jylda 5 myń qazaqstandyq qaıtys bolady. Bunyń basty sebepteri, elimizde qant dıabetin aldyn alýǵa baǵyttalǵan kásibı medıtsınalyq is-sharalar júrgizilmeıdi, endokrınologııalyq qyzmettiń zamanaýı qurylymy joq, endokrınolog-mamandar jetispeıdi, al keıbir aýrýhanalarda endokrınologııalyq bólmeler múldem joq. Eń bastysy, qant dıabetine qarsy memlekettik baǵdarlama joq. Bul - basty másele. QR Densaýlyq kodeksine sáıkes qant dıabeti týberkýlez sııaqty áleýmettik mańyzy bar aýrýlarǵa jatady. Sondyqtan oǵan dýshar bolǵan adamdardy statsıonarǵa ornalastyryp, tıisti emdeý jumystaryn júrgizý qajet. Bizdińshe, QR Densaýlyq saqtaý mınıstrligi janynan Endokrınologııa jáne endokrınologııalyq hırýrgııa ulttyq ǵylymı-zertteý ortalyǵyn qurý qajet. Men Adam quqyqtary jónindegi komıssııanyń otyrysynda osy máseleni kótergen bolatynmyn. Biraq mınıstrlik ókilderi bizdiń bul usynysymyzben kelisken joq», - deıdi N.Joldasbaeva.
