Qazaqstanda eńbekke jaramsyzdyq paraǵyna qatysty jańa tártip engiziledi: 434 aýrý tizimge endi
ASTANA. KAZINFORM — Qazaqstanda ýaqytsha eńbekke jaramsyzdyq merzimi eki aıdan asatyn aýrýlardyń tizimi jańartyldy. Densaýlyq saqtaý mınıstriniń 2026 jylǵy 6 qarashadaǵy buıryǵyna sáıkes, qujatqa 434 aýrý engizilgen. Jańartylǵan tizimde aýyr juqpaly aýrýlar, júıke júıesi men júrek-qan tamyrlary júıesiniń syrqattary, onkologııalyq jáne qan aýrýlary, sondaı-aq túrli jaraqat bar.
Atap aıtqanda, tizimge týberkýlez, oba, sibir jarasynyń ókpelik túri, menıngokokk ınfektsııasy, qutyrý, vırýstyq entsefalıt, A jáne V gepatıtteriniń aýyr túrleri, AITV ınfektsııasy jáne bezgek engizilgen.
Sondaı-aq qaterli jáne qatersiz isikter, leıkozdyń túrleri, aplastıkalyq anemııa, qan uıýynyń buzylýy, jedel mıokard ınfarkti, júrek jetkiliksizdigi, jaıylǵan skleroz, baýyr tsırrozy, epılepsııa jáne shızofrenııa da osy sanatqa jatady. Budan bólek, kúıik, úsik jáne ózge de jaraqattar boıynsha eńbekke jaramsyzdyq merzimi eki aıdan asýy múmkin aýrýlar qataryna engizilgen.
Mınıstrlik buıryǵy 2026 jylǵy 24 qarashadan bastap kúshine enedi. Buǵan deıin Qazaqstannyń 4 óńirinde juqpaly aýrýlar týraly shuǵyl habarlaý júıesi synaqtan ótip jatqany týraly jazǵan edik.