Qazaqstanda eńbekke jappaı umtylys aıryqsha qundylyq bolýy tıis - D. Myńbaı
Búgin Astanadaǵy «Áleýmettik jańǵyrtý - Qazaqstannyń qazirgi kezeńdegi damýynyń basty paradtıgmasy» Qazaqstan saıasattanýshylarynyń kongresinde QR Mádenıet jáne aqparat mınıstri Darhan Myńbaı osylaı aıtty.
Eýropadaǵy keıbir elderdegi eńbek qundylyǵy problemalaryna toqtalǵan mınıstr, «barlyǵy az jumys istep, kóp tabys jasaǵysy keledi. Bul qadamdardy qabyldaý tıimsiz jáne qaterli. Bizdiń elde eńbekke jappaı umtylys aıryqsha qundylyq bolýy tıis. Biz qazaqstandyqtar respýblıkanyń budan ary qaraı damýy úshin qatań básekelestik ornaǵan qazirgi zamanǵy álemde kóp ári sapaly jumys isteý kerektigin túsinýimiz qajet. Atap aıtqanda, árdaıym kásibı biliktilik pen bilimdi jetildirip otyrý mańyzdy»,-dedi. Osy oraıda D. Myńbaı tek eńbek qana Qazaqstannyń jetistikteriniń kepili bola alatynyn elimizdiń ár azamaty jetik túsinýi shart ekenin qadap aıtty.
Mınıstrdiń paıymdaýynsha, qoǵamda jáne adamda eńbekqorlyqty, kásibı biliktilikti arttyrýǵa umtylysty, ádil eńbekti qalyptastyrý baǵytynda jumys isteý kerek.
«Bizdiń aınalamyzdaǵy ómir qatań básekelestik qaǵıdalary boıynsha damyp keledi. Sondyqtan da tynyshtyqty saqtap qalý úshin qoǵamdy biriktirýge negizdelgen ár ıdeıany ustaný qajet»,-dep túıdi D. Myńbaı.
Kongress jumysyna Parlament depýtattary, memlekettik organdardyń, ǵylymı-zertteý mekemeleriniń, úkimettik emes uıymdardyń ókilderi, sondaı-aq qazaqstandyq jáne sheteldik sarapshylar qatysty. Atalǵan aıtýly jıyn barysynda «Áleýmettik jańǵyrtýdyń qoǵamdyq-saıası jáne rýhanı-qundylyq aspektileri» jáne «Qazirgi zamanǵy aqparattyq qoǵam jaǵdaıyndaǵy áleýmettik jańǵyrtý» taqyryptarynda sessııalyq talqylaýlar ótti.
