Qazaqstanda eńbekke qabiletinen aıyrylǵan adamnyń járdemaqysy qansha
ASTANA. KAZINFORM - Jyl basynan beri múgedektik jáne asyraýshysynan aıyrylý jaǵdaıy boıynsha memlekettik áleýmettik járdemaqy tóleýge respýblıkalyq bıýdjetten 152,7 mlrd teńge jumsaldy.
Buǵan qosymsha Memlekettik áleýmettik saqtandyrý qorynan eńbekke qabilettiliginen aıyrylý jáne asyraýshysynan aıyrylý boıynsha shamamen 20,1 mlrd teńge somasyna áleýmettik tólem berildi.
2024 jylǵy 1 sáýirdegi jaǵdaı boıynsha múgedektigi boıynsha MÁJ alýshylar sany shamamen 539,8 myń adamdy, asyraýshysynan aıyrylý jaǵdaıy boıynsha — shamamen 196,1 myń adam.
Múgedektigi boıynsha memlekettik áleýmettik járdemaqy mólsheri múgedektiktiń tobyna jáne sebebine, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilengen eń tómengi kúnkóris deńgeıiniń shamasyna baılanysty bolady.
Asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri qaıtys bolǵan asyraýshynyń asyraýyndaǵy adamdardyń sanyna, qaıtys bolý sebepterine jáne eń tómengi kúnkóris deńgeıine baılanysty bolady.
Budan basqa, mindetti áleýmettik saqtandyrý júıesine qatysýshylarǵa áleýmettik táýekelder týyndaǵan jaǵdaıda MÁSQ-ten áleýmettik tólem beriledi.
Máselen, 1 sáýirdegi jaǵdaı boıynsha 90,9 myń adam eńbek qabiletinen aıyrylý boıynsha, al 61,2 myńǵa jýyq otbasy asyraýshysynan aıyrylý boıynsha áleýmettik tólem aldy.
Tólemderdiń mólsheri jeke bolady jáne mynalarǵa baılanysty: sońǵy 2 jyldaǵy MÁSQ-ke áleýmettik aýdarymdar júrgizilgen ortasha aılyq tabys, eńbekke qabiletinen aıyrylý koeffıtsıentteri, asyraýyndaǵy adam sany, mindetti áleýmettik saqtandyrý júıesine qatysý ótili jáne tabysty aýystyrý.
Bul tólemder respýblıkalyq bıýdjetten tólenetin uqsas járdemaqylarǵa qosymsha júzege asady.
2024 jylǵy 1 qańtardan bastap múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqy mólsheri eń tómen kúnkóris deńgeıiniń ulǵaıýyna baılanysty 7% ósti.
Úkimet sheshimi boıynsha eńbekke qabiletinen aıyrylý jáne asyraýshysynan aıyrylý boıynsha MÁSQ-ten tólenetin tólemderdiń mólsheri de 7% artty.
Máselen, jalpy aýrýdan múgedektigi boıynsha MÁJ mólsheri 1-top úshin — 95 496 teńge, 2-top úshin — 76 397 teńge, 3-top úshin — 52 089 teńge.
2024 jylǵy 1 sáýirdegi jaǵdaı boıynsha eńbekke qabiletinen aıyrylý boıynsha áleýmettik tólemderdiń ortasha mólsheri — 57 346 teńge, asyraýshysynan aıyrylý boıynsha — 58 543 teńge.
