Qazaqstanda eńbekke qabiletti halyqtyń úshten biri joǵary bilimdi
ASTANA. QazAqparat - QR Bilim jáne ǵylym mınıstri Erlan Saǵadıev elimizdegi jáne kórshiles elderdegi joǵary bilimdi adamdardyń sanyn salystyrdy, dep habarlaıdy QazAqparat.
Onyń sózine qaraǵanda, Reseıde joǵary bilimi bar halyqtyń úlesi Qazaqstannyń barsha turǵyndaryna shaqqandaǵy kórsetkishten asyp otyr.
«ıAǵnı olarda joǵary bilimdi adamdar 18 mıllıonǵa artyq. Al biz biryńǵaı ekonomıkalyq keńistiktemiz. Úsh kún buryn biz Qytaıda boldyq. Bul elde 55 mln. mektep túlekteri, 8 mln. joǵary oqý oryndary túlekteri bar jáne olar osy kórsetkishti úsh esege arttyrmaq. Jalpy, barlyq elderdiń búgingi baǵdaryna toqtalatyn bolsaq, qazirgi ýaqyttaǵy ekonomıka úshin eńbekke qabiletti halyqtyń 50 paıyzy joǵary bilimdi bolýy tıis. Bizde búginde sáıkesinshe 34 paıyz deńgeıinde. Eger de eseptep qarasaq, bir mıllıon adam jetispeıdi»,-dedi mınıstr «Qazaqstan Respýblıkasynyń keıbir zańnamalyq aktilerine joǵary oqý oryndarynyń akademııalyq jáne basqarý derbestigin keńeıtý máseleleri boıynsha ózgerister men tolyqtyrýlar engizý týraly» zań jobasyn tanystyrý barysynda.
Onyń paıymynsha, biryńǵaı ekonomıkalyq keńistikte besekelese otyryp, Qazaqstan joǵary bilimdi adamdarǵa senim arta alady. Sonymen qatar qysqa merzimde túbegeıli basqa mamandyqtardy qaıta meńgerip shyǵatyndaı adamdarǵa jaǵdaı jasaý kerek.
Saǵadıev sarapshylardyń tujyrymyna súıene otyryp, joǵary bilimdi adam turaqty jumys oryndaryn qurýǵa qaýqarly ekendigin atap ótti.
Zań jobasy «Bes ınstıtýtsıonaldyq reformany iske asyrý jónindegi 100 naqty qadam - Ult josparynyń» 78-qadamyn júzege asyrý maqsatynda ázirlengen. Onda Nazarbaev Ýnıversıtetiniń tájirıbesin eskere otyryp, joǵary oqý oryndarynyń akademııalyq jáne basqarý derbestigin satylaı keńeıtý ekserilgen.
