Qazaqstanda eńbekke qabiletti halyqtyń 48%-yn áıelder quraıdy
ASTANA. QazAqparat – Qazaqstanda 4,3 mln áıel jumyspen qamtylǵan. Bul – eńbek maıdanynda júrgen jalpy halyqtyń 48%-y. Búgin elimizdiń arýlaryn Halyqaralyq áıelder kúnimen quttyqtaǵan QR Úkimet basshysynyń quttyqtaýynda osyndaı málimetter keltirilgen, dep habarlaıdy QazAqparat.
Úkimettiń resmı saıtyndaǵy málimetterge qaraǵanda, qazirgi kezeńde áıelder qaýymy qoǵamdyq ómirdiń eń belsendi bóligine aınalyp otyr.
Qazaqstanda 4,3 mln áıel jumyspen qamtylǵan. Bul – eńbek maıdanynda júrgen jalpy halyqtyń 48%-y. Memleket sýbsıdııalaıtyn jumys oryndaryna turýǵa boıjetken qyzdarymyz belsendilik tanytady. Ótken jyly 30 myńǵa jýyq jas boıjetken jumysqa ornalasyp, alǵashqy eńbek jolyn bastady.
Memleket bıznespen aınalysýǵa nıetti áıelderdi bútindeı qoldap keledi. Olardy oqytyp, ári qaraı jumysqa turýyna nemese bıznes álemindegi baǵyn synaýyna múmkindik beredi. Granttar men jeńildikti qaryz bólip, sýbsıdııalanǵan jáne kepildendirilgen nesıe usynady.
EYDU derekterine saı, Qazaqstanda kásipker áıelderdiń úlesi 45%-dy qurap otyr. Bul – AQSh jáne Túrkııa elderimen salystyrǵanda joǵary kórsetkish.
Áıelderdiń densaýlyǵyna da zor kóńil bólinip keledi. Tek 2022 jyldyń ózinde ǵana ana ólim-jitiminiń 2,6 esege azaıǵany – osynaý dáıekti jumystardyń nátıjesi.
Bizdiń elimizde áıelder er-azamattarmen qatar ıyq tirestire júrip, memlekettik basqarý isine belsendi qatysyp otyr. Eger 2010 jyly memlekettik qyzmettegi áıelderdiń úlesi 52,7% bolsa, ótken jyly 55,4%-ǵa jetti.
Úkimet, sondaı-aq, menshiginde memlekettiń qatysý úlesi bar kompanııalar basshylyǵynda áıelderdiń úlesin 30%-ǵa deıin kezeń-kezeńmen arttyrý sharalaryn qabyldaýda.
Áıelderdi áleýmettik qoldaý máselesi de nazardan tys qalmaıdy. Ana men balany qorǵaý, kópbalaly analarǵa, bala asyrap alynǵan otbasylarǵa kómek kórsetý, jumysqa ornalasýǵa járdemdesý, úlkenderge qamqorlyq jasaý memlekettik saıasattyń mańyzdy baǵyttary bolyp qala bermek.
Qazaqstan genderlik teńdik ornaǵan qoǵam qalyptastyrýda aıtarlyqtaı jetistikterge jetti. 2022 jyly Qazaqstan osy saladaǵy tabysty reformalardyń arqasynda «Genderlik alshaqtyq ındeksi» (Global Gender Gap Index) reıtıngi boıynsha 15 pozıtsııaǵa joǵarylap, 146 eldiń arasynda 65-shi oryndy ıelendi.
Memleket aldaǵy ýaqytta da qazaqstandyq áıelderdiń ál-aýqatyn jaqsartý úshin bar kúshin salady.
«Kórikti kóktemniń osynaý shýaqty kúninde ekonomıkanyń san túrli salasynda eńbek etip, eldigimizdi nyǵaıtýǵa, kemel urpaq tárbıelep, otbasylyq qundylyqtarymyzdy baıandy etýge ólsheýsiz úles qosyp kele jatqan Sizderge shynaıy qurmetimdi bildirýge ruqsat etińizder. Barshańyzǵa zor densaýlyq, shańyraqtaryńyzǵa shattyq tileımin. Merekelerińiz qutty bolsyn!»,-delingen QR PRemer-Mınıstriniń quttyqtaýynda.
