Qazaqstanda eńbek mıgranttarynyń barlyq túri qalyptasyp otyr
ASTANA. 13 qarasha. QazAqparat - Búgin QR Parlamenti Májilisinde «Qazaqstan Respýblıkasynyń keıbir zańnamalyq aktilerine eńbek kóshi-qony máseleleri boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótti.
Zań jobasy Elbasynyń shetelden keletin eńbek mıgranttaryn tıimdi esepke alý, olardyń áleýmettik jáne eńbek quqyqtaryn qorǵaý, sonymen qatar kiris pen salyqtyń ashyqtyǵyn zańdastyrý maqsatynda keshendi sharalar qabyldaý týraly tapsyrmasyn oryndaý maqsatynda ázirlengen. Toqtala ketetin jaıt, elimizde sheteldikterge, jeke adamdarda eńbek qyzmetin júzege asyratyn TMD azamattary úshin kóshi-qondy baqylaý máselesi rettelmegen. Osyǵan oraı, zańnamada jeke tulǵalarǵa sheteldik jumys kúshin tartýǵa ruqsattar berý kózdelmegen. Sonyń saldarynan mundaı qyzmet zańsyz atqarylyp jatyr. «Búgingi kúni halyqtyń kóshi-qony kóptúrli qubylystardy týdyryp otyrǵany aıqyn. Ol ekonomıkaǵa da saıasatqa da demografııalyq úderisterge de, sondaı-aq ultaralyq qarym qatynastar men ıdeologııalarǵa, dinge de barynsha áser etedi. Jahandyq daǵdarysqa oraı eńbek mıgratsııasy máselesiniń ótkirligi onan saıyn órship barady dese de bolady. Atap aıtqanda, jumys kúshiniń sapasymen ara qatynasy boıynsha eńbek naryǵynyń suranysy, mıgranttardyń quqyn qorǵaý boıynsha olardyń qyzmetin zańdastyrý, olardyń mádenı jáne eńbekke beıimdiligi sekildi máseleler ózekti bola túsýde», - deıdi Májilis depýtaty Rahmet Muqashev.
Onyń aıtýynsha, Qazaqstanda eńbek mıgranttarynyń barlyq negizgi túrleri, atap aıtqanda ishki, ishki jáne oblysaralyq, syrtqy, zańdy jáne zańsyz, ýaqytsha, maýsymdyq, tranzıttik, shekaraaralyq túrleri keńinen taralǵan. Bul rette elimiz mıgratsııa úshin shyǵatyn, keletin jáne tranzıttik elder qataryna jatady.
«Qazaqstandaǵy eńbek kóshi-qonynyń rettelmeýi, lıtsenzııalanǵan jumys kúshiniń kórsetkishinen asyp túsedi. Kommertsııalyq kóshi-qon da taralǵan.
Jalpy alǵanda zań jobasynyń maqsaty sheteldik jumys kúshin tartýǵa ruqsattar berýdiń tártibin jeńildetý bóliginde kóshi-qon úderisin memlekettik retteý bolyp tabylady.
«Zań jobasyn qabyldaý elimizdiń eńbek kóshi-qony salasynda kóptegen jyldar boıy qalyptasqan problemalardy sheshýge septigin tıgizedi», - deıdi depýtat R. Muqashev.
