Qazaqstanda eńbek mıgranttaryn tirkeý júıesi jeńildetiledi
ASTANA. 3 qazan. QazAqparat - Qazaqstan Úkimeti eńbek mıgranttaryn tirkeý júıesin jeńildetýdi kózdeıtin ózgeristerdi daıyndap jatyr.
Bul týraly búgin Astanada ótken baspasóz máslıhatynda Adam quqyqtary jónindegi ulttyq ortalyqtyń basshysy Vıacheslav Kalıýjnyı málim etti.
Ortalyq basshysy atap kórsetkendeı, búginde shetelden keletin eńbek mıgranttaryn tirkeý júıesi tym qatty bolǵandyqtan, elimizde jasyryn kóshi-qon máselesi ózekti bolyp tur. «Sol sebepti biz respýblıka aýmaǵynda naqty qansha eńbek mıgranttardyń bar ekendigin bilmeı otyrmyz. Onyń statıstıkasyn shyǵarý múmkin bolmaýda. Óıtkeni shekara aýmaǵynda kúndiz Qazaqstan jerinde jumys istep, keshke qaraı óz úılerine qaıtatyn eńbek mıgranttary da bar», - deıdi V.Kalıýjnyı. Onyń aıtýynsha, osydan úsh jyl buryn eńbek mıgranttaryn zańdastyrý barysynda Qazaqstanda 100 myńdaı shetelden kelgen jumysshy tirkeldi. Biraq ýaqyt óte kele, tirkeý kezindegi qujattardyń kóptigine baılanysty zańdy aınalyp ótetin mıgranttar arta bastady. «Sondyqtan Qazaqstan Úkimet tıisti is-sharalardy qolǵa alyp, eńbek mıgranttaryn tirkeýdiń jeńildetilgen júıesin ázirlep jatyr. Alaıda naqty qaı baǵytta júrgizilip jatqandyǵyn men ázirshe aıta almaımyn», - dep atap kórsetti V.Kalıýjnyı.
