Qazaqstanda eńbek quqyqtaryn qorǵaý qalaı júrgizilip jatyr
ASTANA. KAZINFORM – Qazaqstanda eńbek quqyqtaryn qorǵaý baǵytyndaǵy baqylaý júıeli túrde kúsheıtilip keledi. Bul týraly QR Eńbek jáne halyqty áleýmettik qorǵaý mınıstrligi Eńbek ınspektsııasy komıtetiniń tóraǵasy Meırambek Ahmetov Ortalyq kommýnıkatsııalar qyzmetinde ótken baspasóz konferentsııasynda málimdedi.
Onyń aıtýynsha, memlekettik eńbek ınspektsııasynyń negizgi mindeti – azamattardyń eńbek quqyqtaryn qorǵaý jáne zańbuzýshylyqtardyń aldyn alý.
– Biz eńbek zańnamasynyń saqtalýyn qamtamasyz etýge, eńbek daýlary táýekelin azaıtýǵa jáne qaýipsiz eńbek jaǵdaılaryn qalyptastyrýǵa basa mán berip otyrmyz, – dedi ol.
Komıtet tóraǵasy 2026 jyldyń birinshi toqsanynda júrgizilgen jumystardyń nátıjesine toqtaldy.
– Osy kezeńde 16 726 azamattyń ótinishi qaraldy. 1 723 jospardan tys tekserý júrgizilip, profılaktıkalyq baqylaý aıasynda 92 tekserý ótti. Nátıjesinde 2 065 zańbuzýshylyq anyqtalyp, 1 110 nusqama berildi. Sonymen qatar 136 mln teńge kóleminde ákimshilik aıyppul salyndy, – dedi Meırambek Ahmetov.
Onyń sózinshe, eńbek quqyqtaryn qorǵaý jáne qaýipsiz eńbek jaǵdaılaryn qamtamasyz etý baǵytyndaǵy jumystar aldaǵy ýaqytta da jalǵasady.
Aıta keteıik, Qazaqstannyń eńbek naryǵynda suranysqa ıe mamandyqtar men jalaqy deńgeıi týraly tolyǵyraq Kazinform agenttiginiń analıtıkalyq materıalynda jazylǵan.
