Qazaqstanda eńbek qaýipsizdigi boıynsha jańa talaptar keıinge shegerildi
ASTANA. KAZINFORM — Eńbek qaýipsizdigi jáne eńbekti qorǵaý máseleleri boıynsha oqytý men bilimin tekserýdiń jańa qaǵıdalary bıyl kúshine enbeıdi. QR Eńbek jáne halyqty áleýmettik qorǵaý mınıstrligi olardy engizý merzimin 2026 jylǵy 12 shildeden 2027 jylǵy 1 qańtarǵa shegerýdi usyndy.
Mınıstrlikke jańa qaǵıdalardy qoldanýǵa qatysty azamattar men uıymdardan kóptegen ótinishter túsken. Osyǵan baılanysty jumys berýshilerdiń, oqytý uıymdarynyń jáne sarapshylar qaýymdastyǵynyń pikirleri eskerilip, qujatty qosymsha talqylaý týraly sheshim qabyldandy.
Eske sala keteıik, Eńbek jáne halyqty áleýmettik qorǵaý mınıstriniń 2026 jylǵy 30 mamyrdaǵy № 223 buıryǵymen eńbek qaýipsizdigi salasyndaǵy oqytý júıesine jańa talaptar engizilgen bolatyn. Qujatta oqý ortalyqtaryna qoıylatyn talaptar, olardyń tizbesin qalyptastyrý tártibi jáne mamandardyń jekelegen sanattaryn daıarlaýdyń arnaıy erejeleri qarastyrylǵan.
Mınıstrlik jańa talaptar kúshine engenge deıin áleýmettik áriptestermen, kásipodaqtarmen, jumys berýshilermen jáne basqa da múddeli taraptarmen keń aýqymdy talqylaýdy jalǵastyratynyn málimdedi. Talqylaý nátıjesinde qajet bolǵan jaǵdaıda normatıvtik quqyqtyq aktilerge ózgerister engiziledi.
Eske salaıyq, buǵan deıin elimizde eńbek ótilin tirkeý tolyqtaı tsıfrlandyrylatynyn habarlaǵan edik.
