Qazaqstanda eńbek qaýipsizdiginiń tujyrymdamasy ázirlenýde
Búgin 5-shi Astana ekonomıkalyq forýmy aıasynda ótip jatqan «Jumyspen qamtý jáne laıyqty eńbek salasyndaǵy jahandyq úrdister» sessııasynda QR Eńbek jáne halyqty áleýmettik qorǵaý mınıstri Gúlshara Ábdiqalyqova osylaı málim etti.
«Laıyqty eńbek - bul birinshi kezekte qaýipsiz eńbek. Degenmen biz bul maqsattarǵa qol jetkizýden birshama qashyqtamyz. Jyl saıyn Qazaqstanda qaıǵyly oqıǵalar saldarynan 300-den astam adam qaza taýyp, aıtarlyqtaı adamı jáne ekonomıkalyq shyǵyndarǵa ákeledi», - dedi jıyndy ashyp sóz sóılegen mınıstr.
Onyń paıymynsha, eńbekti qorǵaý táýekelderin basqarý strategııasynyń mańyzdy sáti oryn alǵan qaıǵyly oqıǵalardyń saldaryn joıýdan olardy aldyn ala eskertýge, jumysshylardyń densaýlyǵyn saqtaýǵa baǵyttalǵan keshendi sharalardy júzege asyrýǵa kóshý bolyp tabylady.
«Osyǵan oraı mınıstrlik aldaǵy jyldarǵa arnalǵan Qazaqstan Respýblıkasynda eńbek qaýipsizdigi jáne eńbek qorǵaý boıynsha tujyrymdama ázirleýde. Onda ónidiristik jaraqat pen aýrýdyń aldyn alý, jumysshylardyń densaýlyǵyn saqtaý jáne nyǵaıtý, eńbek jaǵdaıyn jáne jumys ortasyn jaqsartý baǵytyndaǵy keshendi qadamdar kórinis tabatyn bolady», - dedi G.Ábdiqalyqova.
