Qazaqstanda eńbek qaýipsizdigi jáne eńbekti qorǵaý aktileri qaıta qaralady
«Kásiporyndarda jumys isteıtin 1 mln 600 myńǵa jýyq qazaqstandyq tekserýden ótti. Nátıjesinde búgingi kúni shamamen 373 myńǵa jýyq adamnyń zııandy jaǵdaıda jumys isteıtini anyqtaldy. Bul - tekserýden ótken jumysshylardyń árbir tórtinshisi degen sóz», - dedi B.Saparbaev.
Onyń atap ótýinshe, qolaısyz jaǵdaılardyń saldarynan ónerkásiptik jaraqattar ǵana emes, sondaı-aq kásiptik aýrýlardyń sany da kóbeıip alyp otyr. Máselen, mınıstrlik málimetinshe, tek 2018 jyly saqtandyrý uıymdary eńbekke qabiletin joǵaltýyna baılanysty zalaldy óteý úshin 2 606 qyzmetkerge 4,5 mlrd teńge tólegen.
«Belgilengen problemalardy eskere otyryp, zııandy eńbek jaǵdaılary boıynsha jumys oryndaryn túbegeıli qysqartý jáne óndiristik jaraqattardy nólge deıin tómendetý mindetin qoıdyq», - dedi mınıstr.
Eńbek jáne halyqty áleýmettik qorǵaý mınıstrligi osy baǵytta keshendi jumys júrgizip jatyr. Atap aıtqanda, aldaǵy 5 jylda eńbek qaýipsizdigi jáne eńbekti qorǵaý jónindegi normatıvtik-quqyqtyq aktilerdi qaıta qaraýdy josparlap otyr.
Osylaısha, mınıstrlik 2019-2023 jyldarǵa arnalǵan Qazaqstan Respýblıkasynda zııandy eńbek jaǵdaılary boıynsha óndiristik jaraqattanýdy jáne óndiristik jaraqattanýdy jáne eńbek jaǵdaılary zııandy jumys oryndaryn azaıtý boıynsha jol kartasyn ázirledi. Qujatta qabyldanǵan sharalardyń oryndalýy memlekettik baqylaýdyń tıimdiligin arttyrýǵa, kásibı táýekelderdi basqarýdyń zamanaýı júıesin engizýge, eńbekti qorǵaý salasyndaǵy fýnktsııalardy avtomattandyrýǵa jáne áleýmettik áriptestik ınstıtýtyn tıimdi paıdalanýǵa baǵyttalǵan.
Eńbek mınıstrliginiń ınternet-resýrsy alańynda «Eńbekti qorǵaý jáne qaýipsizdik» aqparattyq júıesimen ıntegratsııalanǵan eńbekti qorǵaý salasynda elektrondyq portal qurý máselesi pysyqtalýda. Portal bazasynda statıstıkalyq esep júıesi jáne eńbek zańnamasy máseleleri boıynsha elektrondyq konsýltant qurylady.
