Qazaqstanda eńbek qaýipsizdigi sharttaryn oryndamaǵan 27 óndiris nysanynyń jumysy ýaqytsha toqtatyldy

ASTANA. QazAqparat - Qazaqstanda eńbek qaýipsizdigi sharttaryn oryndamaǵan 27 óndiris nysanynyń jumysy ýaqytsha toqtatyldy. Bul týraly búgin elordadaǵy «Kórme» ortalyǵynda ótip jatqan 6-shy Qazaqstandyq halyqaralyq konferentsııa barysynda QR Densaýlyq saqtaý jáne áleýmettik damý mınıstrligi Eńbek, áleýmettik qorǵaý jáne kóshi-qon komıtetiniń tóraǵasy Aqmádı Sarbasov málim etti.

Onyń aıtýynsha, ótken jyly memlekettik eńbek ınspektorlarynyń tekserýi kezinde eńbekti qorǵaý jáne eńbek qaýipsizdigi salasynda anyqtalǵan zań buzý boıynsha 1504 nusqaýlyq berilip, 79,8 mln. teńgege 647 aıyppul salynǵan.
«Jumysshylardyń ómiri men densaýlyǵyna tóngen qaýip-qaterge baılanysty anyqtalǵan zań talaptarynyń buzylýyn buzýshylyqtardy joıýǵa deıin 27 óndiris nysanynyń, 7 jabdyq pen mehanızmderdiń jumysy toqtatyldy. Sonymen qatar, 376 laýazymdy tulǵa qyzmetinen bosatyldy. Quqyq qorǵaý organdaryna 1974 materıal jiberilip, onyń ishinde 180-i boıynsha qylmystyq is qozǵaldy», - dedi A.Sarbasov.
Onyń sózine qaraǵanda, zııandy eńbek jaǵdaılaryndaǵy jumys oryndaryn qysqartý jáne óndiristik jaraqattaný jaǵdaılaryn kezeń-kezeńimen tómendetý maqsatynda sońǵy 5 jylda jumys berýshiler 12 myńǵa jýyq óndiris nysanynda eńbek jaǵdaılaryn attestatsııalaý jumystaryn júrgizgen. Nátıjesinde, 1400-den astam kásiporyn eńbekti qorǵaý jáne eńbek qaýipsizdigi boıynsha halyqaralyq standarttardy engizgen.