Qazaqstanda eńbek qatynastaryn retteıtin vedomstvoaralyq komıssııa qurylady
NUR-SULTAN. QazAqparat – Úkimet basshysy Asqar Mamın Eńbek jáne halyqty áleýmettik qorǵaý mınıstrligine áleýmettik eńbek qatynastarynyń ózekti máselelerin talqylaý jóninde vedomstvoaralyq komıssııa qurýdy júktedi, dep habarlaıdy QazAqparat tilshisi.
«Eńbek máselelerinde medıatsııa keńinen qoldanylyp otyrmaǵanyn atap ótkim keledi. Eńbek daýyn sheshýge memlekettik organdar qatysady. Al bul másele eń aldymen jumysshy men jumys berýshi ortasynda kásipodaqtardyń aralasýymen sheshilýi kerek. Eńbek mınıstrligine kásipodaqtarmen, «Atameken» palatasymen, múddeli memlekettik organdarmen birge jyl sońyna deıin áleýmettik áriptestik formattaryn túrlendirý jóninde usynys berýdi tapsyramyn», - dedi Asqar Mamın Úkimet otyrysynda.
Úkimet basshysy sonymen birge densaýlyq saqtaý men eńbek mınıstrligine kásipodaq federatsııalarmen birlesip, kásiptik aýrýlardy boldyrmaý maqsatynda syrqattardy erte anyqtaý jóninde sharalardy qolǵa alýdy tapsyrdy.
«Eńbek mınıstrligi kásipodaqtarmen, basqa da múddeli memlekettik organdarmen birlesip, Qazaqstannyń halyqaralyq eńbek konfentsııalaryna qosylý múmkindigin qaraýy, áleýmettik eńbek qatynastarynyń ózekti máselelerin talqylaý jóninde vedomstvoaralyq komısııa qurýdy pysyqtasyn», - dedi Úkimet basshysy.
