Qazaqstanda eńbek qatynastaryn retteý jańasha jolmen júrgizilmek
ASTANA. KAZINFORM — Búgin Astanada ótken áleýmettik áriptestik jáne áleýmettik-eńbek qatynastaryn retteý jónindegi respýblıkalyq úshjaqty komıssııasy (RÚK) jumys tobynyń otyrysynda PARYZ» Qazaqstan Respýblıkasy Ulttyq jumys berýshiler konfederatsııasyna resmı túrde bekitildi. Bul týraly vedomstvonyń baspasóz qyzmeti málim etti.
— Kezdesý barysynda jumys berýshi men eńbek ujymy arasyndaǵy ózara qatynastardy retteý jónindegi birlesken is-sharalar josparynyń jobasy qaraldy. Atalǵan másele sheńberinde mınıstr azamattyq-quqyqtyq sıpattaǵy sharttarǵa qoıylatyn jańa zańnamalyq talaptar týraly aqparat berdi. Bul talaptar olardy eńbek qatynastarynan naqty ajyratýǵa jáne jumyskerlerdiń quqyqtaryn qorǵaýdy qamtamasyz etýge múmkindik beredi, — delingen habarlamada.
Sondaı-aq áleýmettik áriptesterdiń ózara is-qımylynyń tıimdiligin arttyrý maqsatynda RÚK týraly erejeni jańartý qajettigi — talqylaýdyń mańyzdy taqyryptarynyń biri boldy. Qatysýshylarǵa atalǵan qujatty jetildirý boıynsha usynystar engizý usynyldy. Atap aıtqanda, komıssııa jumysyna ózge de memlekettik organdardy tartý tetigin erejede bekitý múmkindigi qarastyrylýda, sebebi kún tártibine shyǵarylatyn keıbir máseleler bir ǵana vedomstvonyń quzyretimen shektelmeı, keshendi túrde qaraýdy talap etedi.
Budan bólek otyrysta 28–30 sáýirge josparlanǵan KIOSH-2026 eńbekti qorǵaý jónindegi halyqaralyq konferentsııasy men kórmesine daıyndyq barysy qaraldy. Іs-sharaǵa 8 elden delegatsııalar men 90-ǵa jýyq kompanııanyń qatysýy kútilýde. Aldaǵy is-sharanyń negizgi taqyryby ónerkásiptik qaýipsizdik salasyndaǵy tsıfrlyq transformatsııa jáne jasandy ıntellekt tehnologııalaryn qoldaný bolmaq. Kezdesý qorytyndysy boıynsha taraptar ashyq dıalogqa jáne RÚK alańynda usynylǵan barlyq bastamalardy birlesip pysyqtaýǵa daıyn ekenderin jetkizdi.
Buǵan deıin eńbek naryǵynda bos oryndar kóbeıip, túıindemeler sany azaıǵanyn jazdyq.
