Qazaqstanda eń joǵary jalaqyǵa úmitkerler — ushqyshtar men stıýardessalar
ASTANA. KAZINFORM — 2026 jyldyń shildesinde Qazaqstanda eń joǵary jalaqyny ushqyshtar men stıýardessalar kútetin mamandar qatarynan kórindi. Sonymen qatar Enbek.kz portalynda 104,6 myń bos jumys orny jarııalanyp, jumys izdeýshiler sany 141,2 myńǵa jetti. Bul týraly Eńbek jáne halyqty áleýmettik qorǵaý mınıstrligi málim etti.
Maýsym aıymen salystyrǵanda bos jumys oryndarynyń sany 3,8%-ǵa azaısa, túıindemeler 11,5%-ǵa ósti. Mundaı ózgeris jaz mezgilindegi eńbek naryǵynyń maýsymdyq ereksheligimen baılanysty. Osy ýaqytta oqý oryndarynyń túlekteri eńbek naryǵyna belsendi shyǵyp, jumys izdeýshiler sany artady. Sonyń nátıjesinde jumys kúshiniń usynysy suranysqa qaraǵanda jyldamyraq ósedi.
— Salalar bólinisinde jumys kúshine eń joǵary suranys bilim berý salasynda (23,4 myń bos jumys orny tirkeldi). Sondaı-aq ózge qyzmetter kórsetý salasynda (16,0 myń), densaýlyq saqtaý jáne áleýmettik qyzmet kórsetý (10,3 myń), aýyl, orman jáne balyq sharýashylyǵy salasynda (8,2 myń), óńdeý ónerkásibinde (6,8 myń), qurylys salasynda (5,7 myń) bos jumys orny usynyldy, — delingen habarlamada.
Óńirler boıynsha eń kóp bos jumys orny Astana qalasynda (8,8 myń), Túrkistan oblysynda (7,6 myń), Pavlodar oblysynda (7,1 myń), Almaty qalasynda (7,0 myń) jáne Aqmola oblysynda (6,9 myń) jarııalanǵan.
Biliktilik deńgeıi boıynsha jumys berýshilerdiń suranysynda orta deńgeıdegi mamandarǵa arnalǵan bos jumys oryndarynyń úlesi basym bolyp, barlyq usynystyń 38,8%-yn qurady. Tómen biliktilikti qajet etetin jumys oryndarynyń úlesi 30,7%, al joǵary bilikti mamandarǵa arnalǵan bos jumys oryndarynyń úlesi 30,5% boldy.
— Shilde aıynda jumys izdeýshiler 141,2 myń túıindeme jarııalady. Olardyń ishinde 35 jasqa deıingi azamattardyń úlesi — 54%, bul jaz mezgilinde oqý oryndary túlekteriniń eńbek naryǵyna belsendi shyǵýymen baılanysty. 35–44 jas aralyǵyndaǵy azamattar — 25%, 45–54 jas aralyǵy — 14%, 55 jastan asqandar — 7%. Genderlik quram boıynsha túıindemelerdiń 57%-yn áıelder, 43%-yn erler ornalastyrǵan, — dep habarlady vedomstvodan.
Jumys kúshi usynysynyń biliktilik qurylymy eńbek naryǵyndaǵy suranysqa jalpy sáıkes keledi. Orta deńgeıdegi biliktiligi bar mamandardyń úlesine túıindemelerdiń 38%-y, joǵary bilikti mamandarǵa — 38%, al tómen biliktilikti jumys izdeýshilerge 24% tıesili.
Usynylǵan jalaqy mólsheri boıynsha shilde aıyndaǵy eń joǵary eńbekaqy baǵdarlamalyq qamtamasyz etý arhıtektory laýazymyna (shamamen 1,12 mln teńge), ushý qaýipsizdigi jónindegi ınjener-ınspektorǵa (shamamen 0,91 mln teńge) jáne marketıng pen ónimdi ótkizý bóliminiń bastyǵynyń orynbasaryna (shamamen 0,90 mln teńge) usynyldy.
Al jumys izdeýshiler arasynda eń joǵary jalaqy kútkender — ushqyshtar (shamamen 2,39 mln teńge), stıýardessalar (shamamen 1,43 mln teńge) jáne elektr stantsııasynyń bastyǵy laýazymyna úmitkerler (shamamen 1,32 mln teńge) boldy.
Jalpy alǵanda, shilde aıynyń kórsetkishteri eńbek naryǵyndaǵy maýsymdyq belsendiliktiń artqanyn kórsetedi. Jaz mezgilinde oqý oryndarynyń túlekteri eńbek naryǵyna jappaı shyǵyp, jumys izdeýshiler sanynyń artýyna yqpal etti. Sonymen qatar jumys berýshilerdiń negizgi suranysy burynǵysynsha bilim berý, qyzmet kórsetý jáne densaýlyq saqtaý salalarynda saqtalýda. Jumys kúshi usynysynyń kóbeıýi aldaǵy aılarda bos jumys oryndaryn qajetti kadrlarmen qamtamasyz etýge qolaıly jaǵdaı qalyptastyrady.
2026 jyldyń basynan beri Enbek.kz platformasynda jalpy 709 myń bos jumys orny jáne 877,2 myń túıindeme jarııalanǵan.
Aıta keteıik, jyl basynan beri 250 myńǵa jýyq adam jumyspen qamtyldy.
