Qazaqstanda eń úlken jalaqy ken óndirý ónerkásibi qyzmetkerlerinde - Statıstıka
ASTANA. QazAqparat - QR Statıstıka agenttiginiń habarlaýynsha, 2014 jylǵy maýsymdaǵy bir qyzmetkerdiń ortasha aılyq ataýly jalaqysy 124780 teńgeni qurady.
Bul rette ataýly jalaqy ındeksi 2013 jylǵy maýsymǵa 113,5 paıyzdy, al naqty jalaqy ındeksi 106 paıyzdy qurap otyr.
Agenttik málimetterine qaraǵanda, salalyq qurylymda eń úlken jalaqy ken óndirý ónerkásibi men karerlerdi qazý salasynda bolyp, ol 243,3 myń teńgeni quraǵan, bul ortasha respýblıkalyq deńgeıden 1,9 esege artyq. Al kásibı, ǵylymı jáne tehnıkalyq qyzmettegi jalaqy - 224,0 myń teńge (1,8 ese), qarjy jáne saqtandyrý qyzmetinde - 201,4 myń teńge (1,6 ese) belgilengen.
Sonymen bir mezgilde, eń tómengi jalaqy aýyl, orman jáne balyq sharýashylyǵy qyzmetkerlerinde belgilenip, ol 69,2 myń teńgeni qurady, bul el boıynsha orta kórsetkishten 44,5 paıyzǵa tómen.
«Óńirlik bóliniste eń joǵary jalaqy Mańǵystaý oblysynda belgilenip, bul 222,4 myń teńgege jetti jáne bul kórsetkish ortasha respýblıkalyq deńgeıden shamamen 1,8 esege asady. Al Soltústik Qazaqstan oblysynda munyń shamasy 85,8 myń teńgeni qurap, el boıynsha ortasha deńgeıden 31,2 paıyzǵa tómen bolyp otyr», - delingen baspasóz baıanynda.
