Qazaqstanda eń tómengi jalaqyny arttyrý máselesi qaralady — Serik Jumanǵarın
ASTANA. KAZINFORM — Qazaqstanda aılyq eń tómengi jalaqy mólsherin, azamattyq qyzmetshiler men jaldamaly jumyskerlerdiń tabysyn arttyrý máselesi qaralady. Bul týraly Úkimet otyrysynda Premer-mınıstrdiń orynbasary — ulttyq ekonomıka mınıstri Serik Jumanǵarın málim etti.
Mınıstrdiń aıtýynsha, halyqtyń naqty tabysyn arttyrý Úkimet jumysynyń negizgi basymdyqtarynyń biri bolyp qala beredi.
— Úkimet Ulttyq bankpen jáne Qarjy naryǵyn retteý jáne damytý agenttigimen birlesip 2026–2028 jyldarǵa arnalǵan Makroekonomıkalyq turaqtandyrý jáne halyqtyń ál-aýqatyn arttyrý baǵdarlamasyn iske asyryp jatyr. Sonymen qatar bıyl halyqtyń tabysyn arttyrý boıynsha jeke baǵdarlama qabyldandy, — dedi Serik Jumanǵarın.
Onyń sózinshe, baǵdarlama aıasynda jalaqyny kóterý, sapaly jumys oryndaryn qurý, halyqtyń boryshtyq júktemesin azaıtý jáne kásipkerlikti yntalandyrý jónindegi sharalar iske asyrylady.
— Qarsy mindettemelerdi oryndaý arqyly aılyq eń tómengi jalaqy mólsherin, azamattyq qyzmetshilerdiń jalaqysyn jáne jaldamaly jumyskerlerdiń tabysyn arttyrý máselesi qaralatyn bolady. Sonymen qatar halyqtyń kredıttik júktemesi men tutynýshylyq nesıelerdiń ósýine erekshe nazar aýdarylady, — dedi mınıstr.
Onyń málimetinshe, Úkimet halyqtyń naqty tabysynyń jyl saıyn 2-3 paıyzdan joǵary deńgeıde ósýin qamtamasyz etýdi kózdeıdi. Bul maqsatqa ekonomıkanyń sapaly ósimi men ınflıatsııany tómendetýge baǵyttalǵan sharalar arqyly qol jetkizý josparlanyp otyr.
Serik Jumanǵarınniń aıtýynsha, syrtqy ekonomıkalyq ahýaldyń kúrdelenýine qaramastan, Qazaqstan ekonomıkasy oń ósim kórsetip keledi. 2025 jyldyń qorytyndysynda ishki jalpy ónim 6,5 paıyzǵa ósse, bıylǵy qańtar–mamyr aılarynda ósim 3,7 paıyzdy qurady. Munaı óndirýdi esepke almaǵanda bul kórsetkish 5 paıyzdan asty.
Buǵan deıin Premer-mınıstr barlyq memlekettik jáne qoǵamdyq ınstıtýttardy túbegeıli jańǵyrtý bastalǵanyn aıtqan edi.
