Qazaqstanda eń kóp satylǵan avtokólikter belgili boldy
ASTANA. KAZINFORM – 2026 jyldyń alǵashqy jartyjyldyǵynda Qazaqstandaǵy resmı dılerler 105 886 jańa jeńil jáne kommertsııalyq avtokólik satty. Bul ótken jyldyń sáıkes kezeńimen salystyrǵanda 0,9%-ǵa kóp. Byltyr osy kezeńde rekordtyq kórsetkish tirkelgen edi. Bul týraly Qazaqstannyń avtomobıl odaǵy (QAO) málimdedi.
Qazaqstannyń avtomobıl odaǵynyń prezıdenti Anar Maqashevanyń aıtýynsha, satylym kólemi aıtarlyqtaı ózgermegenimen, naryqtaǵy báseke kúsheıip, tutynýshylardyń talaby artyp keledi.
– Jalpy satylym kólemi aıtarlyqtaı ózgermegenimen, naryqtyń óz ishinde eleýli ózgerister bolyp jatyr. Báseke kúsheıip, satyp alýshylar baǵaǵa, tehnologııaǵa jáne qyzmet kórsetý sapasyna burynǵydan da joǵary talap qoıa bastady. Búginde naryqtyń aýqymy ǵana emes, kompanııalardyń tutynýshylar suranysyna qanshalyqty jyldam beıimdele alatyny da baıqalady, – dedi ol.
Maýsym aıynyń qorytyndysy boıynsha eń kóp satylǵan brend – Chevrolet. Onyń resmı dılerleri 3 117 avtokólik satty. Ekinshi orynda Hyundai tur. Bul brendtiń 3 034 avtokóligi satyldy. Úshinshi orynǵa satylymyn eki eseden astam arttyrǵan Changan kóterildi. Maýsymda atalǵan markanyń 2 565 avtokóligi satylǵan.
Alǵashqy bestikke Chery (1 996 avtokólik) men Haval (1 677 avtokólik) kirdi. Al úzdik ondyqqa JAC, Kia, Jetour, Toyota jáne Geely endi.
Jyldyń alǵashqy jartyjyldyǵynyń qorytyndysy boıynsha da Chevrolet kósh bastady. Osy kezeńde atalǵan brendtiń 17 586 avtokóligi satyldy. Odan keıin Hyundai (17 247 avtokólik) men Kia (12 332 avtokólik) ornalasty.
Changan satylymyn 89,2%-ǵa arttyryp, 9 471 avtokólikpen tórtinshi orynǵa kóterildi. Al alǵashqy bestikti 8 143 avtokólik ótkizgen Chery túıindedi.
Qańtar–maýsym qorytyndysy boıynsha Qazaqstanda eń kóp satylǵan model – Chevrolet Cobalt. Osy kezeńde onyń 16 370 danasy satyldy. Odan keıin Hyundai Tucson (8 601 avtokólik), Kia Sportage (5 200), Changan CS55 Plus (4 017) jáne Hyundai Mufasa (3 119) tur.
Tek maýsym aıynda resmı dılerler 21 861 jańa avtokólik satty. Bul ótken jyldyń maýsymymen salystyrǵanda 12,5%-ǵa kóp. 2025 jyldyń maýsymynda 19 426 jańa avtokólik satylǵan bolatyn.
Sońǵy eki jyldaǵy rekordtyq ósimnen keıin naryqtaǵy ósý qarqyny birshama baıaýlaǵanymen, jańa avtokólikterge suranys áli de joǵary deńgeıde saqtalyp otyr. Sonymen qatar naryqtaǵy báseke kúsheıip, jańadan kelgen markalar barlyq derlik segmentte óz ornyn nyǵaıtyp keledi.
Aıta keteıik, buǵan deıin AQSh-ta órt shyǵý qaýpine baılanysty Kia kompanııasy 460 myńnan astam avtokóligin keri qaıtaratyny týraly jazǵanbyz.
