Qazaqstanda eń kóp satylǵan avtokólik túrleri belgili boldy

ASTANA. KAZINFORM – 2025 jyldyń naýryzynda Qazaqstanda jańa avtomobılderdi satyp alý kórsetkishi 23,4 paıyzǵa ósti.

- Naýryz aıynda 19 629 jeńil avtomobıl men kommertsııalyq tehnıkalar satyldy, bul byltyrǵy usqas kezeńmen salystyrǵanda 23,4% joǵary kórsetkish. Jalpy, bıylǵy birinshi toqsanda 46 843 jańa avtomobıl ótkizildi, al byltyr 39 439 jańa kólik satyldy (+18,8%), - delingen «Qazaqstannyń avtokólik odaǵy» (QAO) málimetinde.

Eń kóp ótken (top-10) avtomobılder kóshin ádettegideı Hyundai (4 472 kólik; byltyrǵy naýryzben salystyrǵanda +32,8%) bastady. Chevrolet (2 738) ekinshi orynda tur (+99,3%), al úshinshi qatardaǵy Kia dılerleri 2 120 kólik satqan (+17,1%). Sonymen qatar, Jetour osymen ekinshi aı qatarynan tórtinshi satyǵa turaqtady (1 362; +74,4%). Al besinshi oryn 1 350 avtomobıli ótken Chery-ge buıyrdy (+2,7%).

Odan bólek tizimge Haval (1 288; +14,6%), Jac (1 071; +54,3%), Geely (1 021; +45,6%), Toyota (862; -21,2%) jáne Changan (703; - 42,1%) endi.

Budan bólek, naýryz aıynda eń tanymal bolǵan top-10 model arasynda Chevrolet Cobalt (2 236 kólik) birinshi tur. Sodan keıin tizimde Hyundai Tucson (1 692), Kia Sportage (1 090), Hyundai Mufasa (955), Haval M6 (607), Chery Tiggo 2 (532), Hyundai Elantra (529), Hyundai Santa Fe (524), Geely Emgrand (493) jáne Jac S3 (461) bar.

Jalpy, bıylǵy birinshi toqsannyń qorytyndysy boıynsha brendter qatarynda Hyundai (11 705 kólik; +26,2%) kósh bastady. Ekinshi orynǵa 6 009 avtomobıli satylǵan Chevrolet shyqsa (+80,1%), úshtikti Kia (4 905; +0,6%) túıindedi. Al Jetour dılerleri 3 103 mashınanyń kiltin tapsyrsa (+61,2%), besinshi satydaǵy Chery-diń 3 097 modeli ótti (-10%).

Buǵan deıin elimizde qansha avtokólik bar ekenin jazǵan edik.