Qazaqstanda eń kóp kezdesetin aılyq kólemi qandaı

NUR-SULTAN. QazAqparat – Ulttyq statıstıka bıýrosy Qazaqstanda eń kóp kezdesetin (modaldyq - red.) aılyq kólemin atady, dep habarlaıdy QazAqparat tilshisi.

«2021 jyldyń qorytyndysy boıynsha Qazaqstan Respýblıkasy boıynsha medıanalyq jáne modaldyq jalaqy 157 863 teńge jáne 173 249 teńge boldy. Sondaı-aq, 2022 jyldan bastap Bıýro toqsandyq negizde medıanalyq jalaqyny baǵalaýdy jarııalaıdy. Aǵymdaǵy jyldyń І toqsanynda medıanalyq jalaqy – 179 970 teńge, al ІІ toqsanynda – 196 728 teńge boldy», - dep jazylǵan bıýronyń QazAqparat saýalyna joldaǵan jaýabynda.

Sondaı-aq, bıýro mamandary qazir resmı statıstıkada negizgi ólshem retinde qoldanylyp júrgen ortasha aılyqtyń qandaı tásilmen esepteletinin baıandaǵan.

«Ulttyq statıstıka bıýrosy ortasha jalaqy týraly aqparatty kásiporyndar men uıymdardan alynǵan derekter negizinde jalaqy qorynyń eseptelgen somasyn qyzmetkerlerdiń naqty sanyna jáne esepti toqsandaǵy aılar sanyna bólý jolymen esepteıdi. Ádette, ár qyzmetker úshin jalaqy mólsheri birqatar faktorlarǵa baılanysty ózgeredi.

Osyndaı aıyrmashylyqtardy eskere otyryp, bıýro basqa da kórsetkishterdi qalyptastyrady – medıanalyq, modaldyq jalaqy, sondaı-aq mamandyqtar boıynsha jalaqy statıstıkasy júrgiziledi», - delingen bıýronyń resmı jaýabynda.

Buǵan deıin jarııalanǵanyndaı, jan basyna shaqqandaǵy ortasha aılyq tabysy 50 myń teńgege jetpeıtin qazaqstandyqtardyń úlesi 38,7% bolyp otyr.