Qazaqstanda eń kóp debıtorlyq bereshek 4 aımaqqa tıesili
ASTANA. QazAqparat - Qazaqstan boıynsha turǵyndardyń kommýnaldyq qyzmetke bereshegi 13 mlrd teńgeden asty. Bul týraly búgin Úkimet otyrysynda málim boldy, dep habarlaıdy QazAqparat.
QR Investıtsııalar jáne damý mınıstri Jeńis Qasymbek debıtorlyq bereshek máselesine toqtala kele, «bıyl tamyz aıyndaǵy jaǵdaı boıynsha tutynýshylardyń kommýnaldyq qyzmetke bereshegi 13 mlrd 747 mln teńgeni qurady. Eń kóp debıtorlyq bereshek 4 aımaqqa tıesili, ıaǵnı Almaty qalasynda - 3 mlrd 300 mln teńge, Astanada - 2 mlrd 617mln, Shymkentte - 2 mlrd 51 mln, al Mańǵystaý oblysy boıynsha 1 mlrd 601 mln teńge boldy», -dedi.
Budan bólek mınıstr turǵyn-úı kommýnaldyq sharýashylyq nysandarynyń jylý berý maýsymyna daıyndyq barysyn baıandady.
«Óńirlerdi aldaǵy jylý berý maýsymyna daıyndaý maqsatynda mınıstrlik 2018-2019 jyldarǵa arnalǵan jumys josparyn bekitti. Josparǵa sáıkes, oblystardyń, Astana men Almaty qalalarynyń ákimdikterine 1 qyrkúıekte bilim berý nysandarynyń júz paıyz daıyndyǵyn qamtamasyz etý qajet.
Bıylǵy 15 qazanǵa deıin barsha nysandardyń daıyndyǵyn aıaqtaý, onyń ishinde, avtonomdyq-qazandyq jáne ınjenerlik jeliler, sonymen qatar, jylý kózderin otynnyń normatıvtik qorymen barlyq avtonomdyq jylytý kózderin qamtýy kerek. Jergilikti atqarýshy organdardyń derekteri boıynsha 10 232 bilim berý nysany nemese 94 paıyzy daıyndaldy. 6 298 densaýlyq saqtaý nysanyn daıyndaý josparlanǵan bolatyn. Qazir 5 971 nysan nemese 95 paıyzy daıyn tur», - dedi Jeńis Qasymbek.
Onyń sózine qaraǵanda, jóndeýge josparlanǵan 45 503 turǵyn úıdiń 35 551 nemese 79 paıyzy jóndeldi. Turǵyn úılerdi jóndeý boıynsha Jambyl, Batys Qazaqstan, Soltústik Qazaqstan oblystarynyń jáne Shymkent qalasynyń daıyndyqtary jetpis paıyzdyq (70%) kórsetkishten tómen.
Budan buryn habarlanǵandaı, Úkimet otyrysynda Premer-Mınıstr Baqytjan Saǵyntaev halyqty sapaly kómirmen qamtamasyz etýge ákimderi tikeleı jaýapty ekenin aıtty.
Sonymen qatar, Jeńis Qasymbek keıbir óńirlerde kómirdi jetkizý jospary oryndalmaǵanyn málim etti.
