Qazaqstanda eń qoljetimdi kólikter qandaı
ASTANA. QazAqparat - Bıylǵy 8 aıda Qazaqstan azamattary 304,6 mlrd teńgege 36 191 jańa jeńil kólik satyp aldy. Bul týraly «QazAvtoÓnerkásip» avtokólik salasyndaǵy kásiporyndar odaǵynan málim etti, dep habarlaıdy QazAqparat tilshisi.
«Jeńil kóliktiń ortasha quny 8 429 926 teńgeni qurap, ótken jyldyń sáıkes kezeńine qaraǵanda 7 paıyzǵa ósti. Qańtar-tamyz aılarynyń qorytyndysy boıynsha satyp alýshylardyń úshten birinen astamy (37,1%) 5 mln teńgeden qymbat emes avtomobılderdi tańdady. Onyń ishinde 19,7 paıyzy nemese 7 146-sy 3,5-5 mln teńge aralyǵyndaǵy kólikter», - delingen habarlamada.
El halqy arasynda 3,5 mln teńgege deıin somadaǵy avtomobılder de suranysqa ıe, ıaǵnı 8 aıdyń ishinde 6 294-i (17,4%) ótkizilgen. Jalpy, 5-7 mln teńgeni quraıtyn 7 700 tehnıka (21,3%) satyldy.
«Kólik satyp alǵandardyń 14,8 paıyzy 7-10 mln teńge aralyǵyndaǵy avtomashınalarǵa tańdaý jasady. Sonymen qatar, bıznes (10-15 mln teńge) ári premıým sanattaǵy (15 mln teńgeden joǵary) segmentter jańa kólikter naryǵynda sáıkesinshe 16,1 paıyzdy (5 822 kólik) jáne 10,7 paıyzdy (3 881 kólik) qamtydy», - delingen «QazAvtoÓnerkásip» málimetinde.
Eń qoljetimdi jeńil modelder reıtınginde usynystardyń kóbisi Qazaqstandaǵy avtoóndirýshilerge tıesili.
Máselen, baǵasy tómen kólikter arasynda 2,8 mln teńgeden bastalatyn Lada Granta kósh bastap tur. Munymen qosa, qoljetimdi TOR-10 quramyna Lada Kalina (2,94 mln teńge), Ravon Nexia (2,95 mln), Ravon R2 (2,98 mln), Lada 4x4 (3,32 mln ), Ravon R4 (3,5 mln), Lada 4x4 Pickup (3,65 mln), Ravon Gentra (3,73 mln), Renault Logan (3,78) jáne Chevrolet Niva (3,99 mln teńge) kólikteri endi.
Al eń qymbat modelder reıtınginde Rolls-Royce Ghost (178,1 mln teńge), Porsche 911 Turbo (66,9 mln) jáne Porsche Panamera (53,4 mln) aldyńǵy qatardan kórinde.
