Qazaqstanda eń qymbat qyzanaqtyń kelisi 5900 teńge turady, eń arzany qansha
ASTANA. KAZINFORM – Ulttyq statıstıka bıýrosynyń málimetteri boıynsha sáýirde bir keli qyzanaqtyń ortasha baǵasy 1 065 teńge turdy. Osy oraıda, óńirler boıynsha eń qymbat jáne eń arzan qyzanaqtyń baǵasyna sholý usynamyz.
Qazir naryqta qyzanaqtyń alýan túri bar, onyń ishinde jergilikti jáne ımporttalǵan ónim usynylady. Sáıkesinshe bul eki arada baǵa aıyrmashylyǵy da bolady.
Qyzanaqtyń eń kóp assortımenti elimizdiń ońtústik aımaqtarynda. Eń arzan qyzanaq Tarazda, kelisi – 600-650 teńge. Atap aıtqanda, sabaǵy úzilmegen qyzanaq 710-750 teńge, qyzǵylt qyzanaq 1200-1800 teńge, cherrı qyzanaǵy 1350-1500 teńge turady.
Almatydan kez kelgen talǵam men ámııanǵa saı qyzanaq túrin tabýǵa bolady. Munda siz kelisi 673 teńgeden 5 myń 900 teńgege deıingi baǵaǵa qyzanaq satyp ala alasyz. Eń qymbat suryptardyń biri – «kýmato» nemese halyq arasynda «qara qyzanaq» dep atalady. Cherrı qyzanaǵynyń arasynda «brıoza» bar. Ádette olardyń qaptamadaǵy 0,5 kelisi 1300 teńgeden bastalady.
Shymkentte eń arzan qyzanaqty aýyl sharýashylyǵy jármeńkelerinen satyp alýǵa bolady. Sýpermarketterde baǵa joǵary. Ortasha alǵanda, qyzanaqtyń quny 700-1200 teńge aralyǵynda. Cherrı qyzanaǵynyń bir kelisi 1200-2000 teńgeden satylyp jatyr. Aıta keteıik, Qyzylorda, Túrkistan jáne Qonaev qalalarynda qyzanaq baǵasy Shymkenttegi baǵaǵa jaqyn.
Óskemen jáne Oral qalasynda qyzanaqtyń kelisi 800-810 teńge.
Aqtaý men Atyraýda baǵa shamalas – 870 teńgeden bastalady, Astana men Pavlodarda da osy baǵa shamasynda.
Eń qymbat qyzanaq - soltústik aımaqtarda. Kókshetaý men Qostanaıda otandyq óndiristegi jylyjaı qyzanaqtarynyń kelisi 900-den 1380 teńgege deıin barady. «Qyzǵylt» - 1380-1400 teńge, cherrı - 1700-den 4300 teńgege deıin.
Soltústik Qazaqstan oblysynda sabaǵy úzilmegen qyzyl qyzanaq pen qyzǵylt qyzanaqtyń baǵasy 940 teńgeden bastalady, cherrı qyzanaǵynyń bir kelisi 1150 teńge turady. Eń qymbaty – sabaǵy bar sary qyzanaq, onyń baǵasy 1300 teńgeden bastalady.
Qaraǵandyda qyzanaq surpyna baılanysty kelisi 1020 teńgeden 2500 teńgege deıin barady. Pavlodardaǵy ınternet-dúkender qyzanaqty 885 teńgeden bastap satyp jatyr.
Globalproductprices.com portaly qyzanaqtyń baǵasy boıynsha qyzyqty statıstıkany keltiredi. Naýryz aıynda Qazaqstanda kókónistiń ortasha baǵasy 2,15 dollar (shamamen 950 teńge) boldy. Bul kórsetkish boıynsha Qazaqstan 77 eldiń arasynda 41-i qatarǵa ornalasqan. Portaldaǵy málimetke súıensek, eń qymbat qyzanaq baǵasy Ońtústik Koreıada – 6,82 dollar, Shveıtsarııada – 5,45 dollar jáne Lıtvadaǵy – 5,37 dollar. Eń arzandary Pákistanda – 0,5 dollar, Bangladeshte – 0,56 dollar jáne Iordanııada – 0,69 dollar.
