Qazaqstanda eń kemi 10-12 mln adam vaktsına alýy qajet - sarapshy
NUR-SULTAN. QazAqparat – Qazaqstanda kem degende 10-12 mln adamdy vaktsınalaý qajet. Bul pikirdi medıtsına ǵylymdarynyń doktory, ımmýnolog, professor, QR Densaýlyq saqtaý mınıstrligi Medıtsınalyq jáne farmatsevtıkalyq baqylaý komıteti dárilik zattar men medıtsına buıymdaryn saraptaý ortalyǵynyń sarapshysy Pavel Derıabın aıtty, dep habarlaıdy QazAqparat tilshisi.
«Biz áli vaktsınalaýdyń bas jaǵynda turmyz. Vaktsınatsııany jedeldetý qajet, óıtkeni Qazaqstan úshin ekpe alǵan bir mıllıon adamnyń sany óte az. Eger Izraıldiń tájirıbesin alsaq, onda qazir halyqtyń 65%-dan astamy egildi. Osyndaı jappaı vaktsınatsııany júrgizý arqyly olar shekteýlerdi alyp jatyr. Ol jaqta is júzinde Covid-ten adam qaıtys bolyp jatqan joq. Sondyqtan da biz osyndaı kórsetkishterge umtylýymyz kerek. Qazaqstanda 18 mıllıon halyqtyń baryn eskersek, eń kemi 10-12 mıllıon adam ınfektsııanyń taralýyna jol bermeıtin osy ımmýndyq qabatty alý úshin ekpe saldyrýy tıis. Ujymdyq ımmýnıtet qalaı qadaǵalanady? Ol tek bir naqty ındıkatormen – vaktsına alǵandardyń sanymen ǵana basqarylady. Barlyq basqa kórsetkishter ujymdyq ımmýnıtettiń mánin kórsetpeıdi», - dedi dáriger onlaın dáriste.
Onyń pikirinshe, jappaı vaktsınalaýdy ásirese úlken qalalarda múmkindiginshe tez júrgizý kerek.
Sonymen birge, zertteýshi vaktsınadan buryn jáne vaktsınadan keıin koronavırýsqa antıdenelerdiń bar-joǵyn zertteý qajet emestigin aıtty, óıtkeni ımmýnıtet tek antıdenelermen ǵana qalyptaspaıdy.
«Vaktsınalaýdan keıin «jady jasýshalary» paıda bolady, olar belgili bir antıdeneler anyqtalmasa da, deneniń vırýstan qorǵalýyna yqpal etedi. Sonymen qatar, koronavırýsqa qarsy antıdenelerdiń barlyǵynda birdeı qorǵanys qasıetteri bolmaıdy. Qorǵaýdy vırýstyń jasýshalarǵa enýin tejeıtin antıdeneler ǵana qamtamasyz etedi, bul «S aqýyzy» dep atalatyn antıdeneler, sonyń arqasynda vırýs jasýsha retseptorlaryna qosylady. Bul antıgen birqatar vaktsınalar jasaýda qoldanylady jáne naqty vaktsınalaýdan keıin paıda bolatyn antıdeneler deneni ınfektsııadan qorǵaıdy», - deıdi P. Derıabın.
