Qazaqstanda eń arzan lımondy qaı óńirden satyp alýǵa bolady?
ASTANA. KAZINFORM — Kún salqyndaǵan kezde adamdar sýyq tıip aýyrady. Sol kezde ımmýnıtetti kóterip, S dárýmenine baı ónimderdi tutynady. Onyń kózi - lımon. Kazinform agenttiginiń tilshisi elimizdiń óńirlerindegi lımon baǵasyn salystyrdy.
Qazaqstan bazarlaryna lımon Túrkııa, Ózbekstan (Tashkent), Ońtústik Afrıka, Qytaı, men Argentınadan jetkiziledi. Sonymen birge elimizdiń ońtústik óńirlerinde lımon ósiriledi. Degenmen Túrkııa men Tashkentten ákelinetin tsıtrýs qoljetimdi. Bul ónimdi bazar sóresinen jıi keziktirýge bolady. Qazaqstan boıynsha lımonnyń kelisi orta eseppen 1 000-1 200 teńge turady. Bir danasy shamamen 150-200 teńge turady.
Qaraǵandy bazarlarynda tańdaý mol. Soǵan sáıkes baǵa da árkelki. Munda Ońtústik Afrıkadan jetkizilgen lımonnyń kelisi 850 teńgeden bastalady. Al Qytaıdan ákelingen tsıtrýstyń kelisi 900 teńge turady. Argentına ónimi kelisine - 1 000 teńge. Qaraǵandyda jergilikti «Topar» lımonyn da satyp alýǵa bolady. Quny kelisine 2 500 teńge turady.
Shymkent pen Oralda lımonnyń kelisi 900-1 000 teńge turady. Bul lomonnyń qabyǵy qalyń bolyp keledi. Shymkentke qabyǵy juqasy Túrkııa men Tashkentten jetkiziledi. Kelisi 1 165-1 500 teńge turady.
Jezqazǵanda lımonnyń kelisi 900-1 400 teńge turady. Al Qostanaıda ımporttalǵan tsıtrýstyń eń arzany kelisine 949 teńgeden satylyp jatyr. Ózbekstannan ákelingen surpy 1 699 teńge turady. Munda bir dana lımon shamamen 220-230 teńgege shyǵady.
Argentınadan ákelgen lımonnyń kelisi Tarazda 950 teńgeden satylyp jatyr. Al Tashkentten jetkizilgeni 1 390 teńge.
Qyzylorda, Petropavl, Óskemen, Semeı jáne Aqtóbede lımonnyń kelisi orta eseppen 1 000-1 200 teńge turady. Qyzylordanyń keı jerlerinde lımon kelisi 1 500 dep kórsetilgen.
Kókshetaýda lımon baǵasy 1 000-1 400 teńge dep qubylyp tur. Almaty men Qonaevta Qytaıdan ákelingen lımonnyń kelisi 1 000 teńge turady. Demek bir danasy 120-150 teńgege shyǵady.
Tashkenttiń lımony 1 200 teńgege saýdalanyp jatyr. Sáıkesinshe bir danasy 150-200 teńge bolady.
Atyraý sýpermarketterinde bir keli lımon baǵasy 1 080 teńge. Al qarapaıym ǵana dúkende kelisi 1 200 teńge. Bir lımon satyp alǵyńyz kelse 200 teńge tóleısiz.
Taldyqorǵanda lımon kelisi orta eseppen 1 350 (Tashkent) jáne 1 100 (Qytaı) teńge turady.
Astanada túrik lımonynyń kelisi 1 199 teńge turady. Ózbekstannan ákelingen lımon quny da osy shamada. Tek dúkenderde 16% jeńildikpen satylyp jatyr.
Pavlodarda lımonnyń kelisi 1 200 teńge turady. Al eń qymbat tsıtrýs Túrkistanda satylyp jatyr. Munda kelisi - 1 500 teńge.
Satýshylardyń aıtýynsha, lımon baǵasyna birneshe faktor áser etedi. Lımonnyń qaıdan ákelingeni, qanshalyqty uzaq saqtaýǵa bolatyny mańyzdy. Sonymen birge qatty nemese jumsaq bolsa da (qattysy jaqsy bolady) baǵaǵa áseri bar. Tutynýshylarǵa qabyǵynyń juqa bolǵany jaqsy. Mundaı lımon kóbine Tashkentten ákelinedi. Onyń dámi de erekshe. Sondyqtan da Túrkııaǵa qaraǵanda Ózbekstannan jetkiziletin lımon baǵasy joǵary.
Lımondy uzaq saqtaý úshin temperatýra 5 gradýstan joǵary bolmaýy tıis. Sonymen birge polıetılen paketine salýǵa bolmaıdy. Ol kezde kóp uzamaı buzylyp, shirı bastaıdy.
Aıta keteıik, buǵan deıin Qazaqstandaǵy klınıng qyzmetiniń quny týraly jazyldy.