Qazaqstanda emshilik dástúrli medıtsınamen teńestirile me – mınıstrlik jaýaby

ASTANA. QazAqparat – Qaznette QR Densaýlyq saqtaý mınıstrligi emshilikti medıtsına dep tanýdy josparlap otyrǵanyn dáleldeıdi delingen qujattyń skrınshoty tarady. Vedomstvo ókilderi bul aqparatty teriske shyǵardy, dep habarlaıdy QazAqparat Stopfake.kz saıtyna silteme jasap.

Mınıstrliktiń baspasóz qyzmetiniń málimetinshe, taralǵan skrınshot 2019-2021 jyldary Dúnıejúzilik bank jobasy aıasynda ázirlengen «Dástúrli medıtsına. Emshilik» kásibı standartynyń jobalyq alǵashqy túrinen jasalǵan. Qazirgi ýaqytta qujat talqylaný ústinde. Joba bekitilgen soń Ashyq NQA portalyna ornalastyrylady.

Atalǵan joba 50-den astam mamandyqqa arnalǵan kásibı standartty qamtıdy.

Emshilerdi dárigerlermen jáne dáleldi medıtsınamen teńestirý týraly aqparat shyndyqqa janaspaıdy. Bul joba olardyń jaýapkershiligin qalyptastyrýǵa jáne standarttarǵa sáıkes keltirýge baǵyttalǵan. Sonymen qatar 2020 jylǵy 7 shildedegi Qazaqstan Respýblıkasynyń «Halyq densaýlyǵy jáne densaýlyq saqtaý júıesi týraly kodeksinde «Dástúrli medıtsına. Emshilik» bólimi bar, onda kelesi normalar bekitilgen: 1. Dástúrli medıtsına – halyq medıtsınasynyń kópǵasyrlyq dástúrlerine negizdelgen jáne medıtsınalyq qoldanýǵa ruqsat etilgen, profılaktıkanyń, dıagnostıkanyń, emdeýdiń jáne ońaltýdyń kodıfıkatsııalanǵan ádisteriniń jıyntyǵy. 2. Medıtsınalyq bilimi bar, densaýlyq saqtaý salasyndaǵy maman sertıfıkaty jáne Qazaqstan Respýblıkasynyń ruqsattar jáne habarlamalar týraly zańnamasyna sáıkes lıtsenzııasy bar adamdardyń dástúrli medıtsına salasyndaǵy qyzmetke quqyǵy bar. 3. Emshilik – emshilik quraldar, tásilder, daǵdylar týraly empırıkalyq málimetterdiń jıyntyǵy jáne densaýlyqqa áser etý maqsatynda olardy praktıkalyq qoldaný. 4. Eki jáne odan kóp adamdardy tarta otyryp, onyń ishinde buqaralyq aqparat quraldaryn paıdalanyp, emshilik seanstaryn júrgizýge tyıym salynady. 5. Emshilik ádisterin qoldaný kezinde adamnyń densaýlyǵyna zııan keltirgen adam Qazaqstan Respýblıkasynyń zańdaryna sáıkes jaýapty bolady

, – dep túsindirdi mınıstrliktiń baspasóz qyzmetiniń ókilderi.

Demek, Qazaqstanda emshilik medıtsınamen teńestirilmeıdi. Elimizde adamdarǵa zııan keltirmeý úshin emshiler sáıkes bolýǵa tıis belgili bir normalar ázirlenip jatyr.