Qazaqstanda emhanany erkin tańdaý naýqany júrip jatyr
Bıyl Qormen alǵashqy medıtsınalyq-sanıtarııalyq kómek kórsetetin 626 medıtsınalyq uıym shart jasasqan, onyń 326-sy (53%) – memlekettik mekeme jáne 258-i (47%) – jekemenshik. Emhanalar tizimin fms.kz saıtyndaǵy «Klınıkany tańdaý» bóliminen kórýge bolady.
Patsıent alǵashqy medıtsınalyq-sanıtarııalyq kómek kórsetetin memlekettik, sonymen qatar jekemenshik uıymǵa tirkele alady. Ol úshin tańdalǵan klınıkada bos ýchaskeler bar-joǵyn aldyn ala naqtylap alǵan durys.
Tirkeý naýqany ne úshin qajet?
Bul aktsııa jyl saıyn ótkiziledi. Naýqan kezinde qazaqstandyqtar ózderi tirkeýde turǵan emhananyń jumysyna qanaǵattanbasa, basqa emhanaǵa aýysa alady nemese óz emhanasy ishinde basqa ýchaskelik dárigerdi tańdaýǵa múmkindigi bar.
Alǵashqy medıtsınalyq-sanıtarııalyq kómek uıymyna tirkelgen patsıent ýchaskelik dárigerdiń qabyldaýy, óziniń densaýlyq jaǵdaıyn baqylaý, ambýlatorııalyq dári-dármekpen qamtamasyz etý, skrınıngtik tekserýler, dıagnostıkalyq zerthanalyq jáne aspaptyq zertteýler syndy medıtsınalyq kómek pen emdeýge jatqyzýǵa joldama alady.
Medıtsınalyq kómeksiz qalmaýy úshin el azamattary turǵylyqty jeri boıynsha emhanada nemese elektrondyq úkimet veb-portalyndaǵy jeke derekterde (ETsQ arqyly avtorızatsııalaý) tirkelý mártebesin tekserý qajet.
Aıta keterligi, tirkeý naýqany patsıentke 2023 jyldyń 1 qańtarynan bastap qyzmet kórsetetin klınıkany tańdaýyna múmkindik beredi.
Emhanany tańdaý kezinde neni eskerý qajet?
Basty eskeretin jaıt – emhana úıden 15-20 mınýt ýaqytta jaıaý jetetin jerde ornalasqany jón. Barlyq emhanalar aýmaqtyq qaǵıdat boıynsha jumys isteıdi jáne patsıent emhananyń qyzmet kórsetý aýmaǵynda turǵan kezde ǵana úıde medıtsınalyq kómek kórsetiledi. Bul ýchaskelik dárigerdiń nemese mobıldi brıgadanyń kómegi qajet bolǵan jaǵdaıda onyń jedel jetýine, sondaı-aq otbasy músheleriniń bir dárigerge qaralýyna múmkindik beredi.
Emhanaǵa qalaı tirkelýge bolady?
Birinshi ádis barlyq azamatarǵa arnalǵan. Elektrondy úkimettiń veb-portaly arqyly bekitý: www.egov.kz saıtyndaǵy «Densaýlyq saqtaý» bóliminde «Medıtsınalyq-sanıtarııalyq alǵashqy kómek kórsetetin medıtsınalyq uıymǵa tirkelý» qyzmetin tańdaý qajet. Aryqaraı elektrondy ótinishtiń barlyq joldaryn toltyrý qajet. Patsıent týraly málimetterdi emhana memlekettik aqparattyq júıelerden avtomatty túrde alady. Jaýap oń bolǵan jaǵdaıda medıtsınalyq uıymǵa tirkelgenińiz týraly habarlama beriledi.
Ekinshi ádis halyqtyń jekelegen sanattaryna arnalǵan. Olar emhanaǵa jeke basyn kýálandyratyn qujatpen tikeleı júgine alady. Atap aıtar bolsaq, zeınetkerler, múgedekter, qamqorshylar taǵaıyndalǵan zań boıynsha bala kezinen múgedekter, qorǵanshylar nemese qamqorshylar, patronattyq tárbıeshiler, kolonııada jazasyn óteýshiler, stýdentter, merzimdi qyzmet áskerı qyzmetshileri, shet memleketterde týǵan balalar, senimhat boıynsha bekitýdi rásimdeıtinder.
Tirkelý naýqanyna árkim qatysýy kerek pe?
Emhanany erkin tańdaý quqyǵyn paıdalanbaǵan azamattar buryn ózi qaralǵan alǵashqy medıtsınalyq-sanıtarııalyq kómek uıymynda tirkelgen kúıi qalady.
Eger medıtsınalyq kómek kórsetý sapasyna qatysty suraqtaryńyz bolsa, olardy óz emhanańyzdaǵy Patsıentterdi qoldaý qyzmetine qoıa alasyz. Eger jaǵdaıdy sol jerde sheshý múmkin bolmasa, onda Áleýmettik medıtsınalyq saqtandyrý qoryna yńǵaıly baılanys arnalary arqyly júginýge bolady: fms.kz resmı saıty, 1406 baılanys ortalyǵy, Qoldau 24/7 mobıldi qosymshasy jáne Telegram-daǵy SaqtandyryBot.
Saqtandyrý mártebesin tekserý jáne júrgizilgen tólemder týraly egov.kz «Densaýlyq saqtaý» bóliminde «Medıtsınalyq qyzmetter týraly jáne MÁMS-ke aýdarylǵan somalar týraly aqparat» memlekettik qyzmeti arqyly bilýge bolady.