Qazaqstanda emhanalar men kommýnaldyq qyzmetterdiń biryńǵaı dızaıny jasalady
ASTANA. QazAqparat - Qazaqstanda azamattarǵa qolaıly jaǵdaı týǵyzý maqsatynda áleýmettik nysandar, memlekettik mekemeler jáne kommýnaldy qyzmetterdiń biryńǵaı dızaınyn jasap shyǵarý usynyldy, dep habarlaıdy QazAqparat.
Mundaı usynys Memlekettik qyzmet isteri jáne sybaılas jemqorlyqqa qarsy is-qımyl agenttigi men elorda ákimdiginiń «Astana - adaldyq alańy» atty birlesken jobasy aıasynda jarııalanyp otyr.
Joba aıasynda qurylǵan jumys toby alǵashqy jartyjyldyq sońyna deıin emhanalarda, memlekettik mekemelerde, kommýnaldy qyzmetterinde bankter men iri kompanııalar mysalynda biregeı ınterer dızaıny men biregeı halyqpen baılanys mehanızmin ázirleıdi dep josparlanǵan.
«Árbir áleýmettik nysannyń brend-beınesin ázirlep, elimizdiń barlyq óńirine taratýymyz qajet. Máselen, kez kelgen bankterdi túsine qarap-aq ajyratýǵa bolady. Sondaı arnaıy belgilerdi jasasaq, adamdar emhanany, túrli memlekettik mekemelerdi birden ajyratar edi. Qazir Astana qalasynda beıimdep kóremiz, qoǵammen talqylanǵan soń, barlyq óńirlerge taratamyz», - dedi «Astana - adaldyq alańy» jobalyq keńsesiniń jetekshisi Jazıra Jylqyshıeva.
Aıta keteıik, elordada Memleket qyzmet isteri jáne sybaılas jemqorlyqqa qarsy is-qımyl agenttiginiń basshysy Alık Shpekbaev pen Astana ákimi Áset Isekeshev «Astana - adaldyq alańy» joba jarǵysyna saltanatty túrde qol qoıdy. Jobanyń negizgi mindeti - turǵyndardyń sybaılas jemqorlyqqa qarsy daǵdysyn damytý jáne memlekettik qyzmet kórsetý sapasyn arttyrý arqyly jemqorlyq máselesin sheshý, turmystyq jemqorlyqty joıý jáne azamattar men bıznes úshin qolaıly jaǵdaı týǵyzý.
