Qazaqstanda emhanaǵa qaralý tártibi ózgerdi: Dárigerler naýqasty birden úsh mamanǵa jibere alady
ASTANA. KAZINFORM – Qazaqstanda emhanaǵa júginý tártibi jeńildedi. Densaýlyq saqtaý mınıstriniń jańa buıryǵyna sáıkes, endi dáriger naýqasty birden úsh mamanǵa jibere alady. Keı jaǵdaıda beıindi dárigerge qaralý úshin ýchaskelik terapevtiń joldamasy da qajet bolmaıdy. Bul ózgerister Densaýlyq saqtaý mınıstriniń jańa buıryǵynda jazylǵan.
Mınıstrliktiń 2026 jylǵy 16 shildedegi №77 buıryǵy 3 tamyzda kúshine endi.
Qujattaǵy basty jańalyqtardyń biri – joldama berý tártibiniń jeńildetilýi. Endi beıindi dáriger naýqastyń jaǵdaıyna qaraı qosymsha tekserýlerge jáne birden úsh túrli mamannyń konsýltatsııasyna joldama bere alady.
Buǵan deıin naýqas qosymsha mamandarǵa qaralý úshin qaıtadan ýchaskelik dárigerge baryp, jańa joldama alýy kerek edi. Jańa tártip dárigerler arasyndaǵy basy artyq rásimderdi azaıtyp, dıagnoz qoıý men emdeýdi jedeldetýge múmkindik beredi.
Sondaı-aq azamattardyń dáriger qabyldaýyna jazylý joldary naqtylandy. Endi qabyldaýǵa emhananyń tirkeý bólimi, call-ortalyǵy, medıtsınalyq aqparattyq júıeler, mobıldi qosymshalar jáne elektrondyq servıster arqyly jazylýǵa bolady.
Buıryqta medıtsınalyq qujattardy rásimdeý talaptary da jańartylǵan. Dárigerler tekserý nátıjelerin, dıagnozdy, emdeý jospary men qorytyndysyn aqparattyq júıege engizýge mindetti. Eger júıe ýaqytsha istemeı qalsa, qujattar qaǵazǵa toltyrylyp, keıin elektrondyq bazaǵa kóshiriledi.
Sonymen birge, medıtsınalyq kómek nátıjelerin tirkeý tártibi naqtylandy. Emdeý qorytyndysy naýqastyń jaǵdaıyna qaraı «saýyǵý», «jaqsarý», «ózgerissiz», «nasharlaý» jáne basqa da kórsetkishter boıynsha baǵalanady.
Mınıstrliktiń málimetinshe, ózgerister dárigerge qaralý rásimin jeńildetip, mamandardyń qabyldaýyna qoljetimdilikti arttyrýǵa baǵyttalǵan.
Aıta keteıik, Qazaqstanda medıtsınalyq uıymdardyń qyzmetin baqylaýǵa arnalǵan biryńǵaı Health Intelligence Platform tsıfrlyq platformasy iske qosyldy.
