Qazaqstanda emes, halyqaralyq alańda «jap-jas qyz» degen pikir aıtyldy - Zúlfııa Súleımenova seksızm jaıly
«Biraz áriptesterim, ıaǵnı mınıstrler quttyqtap, meni qoldaýǵa daıyn ekendikterin jetkizdi. Ákimder de qoldaý tanytty. Óte rızamyn. Eıdjızm, seksızm týraly aıtar bolsaq, ókinishke qaraı qoǵamda áıelderge qatysty ondaı jaǵdaılar bolyp turady. Bul tek Qazaqstanda ǵana emes, jalpy álem elderine qatysty. Meniń oıymsha, bul máselege fılosofııalyq turǵydan qaraý kerek. Ýaıymdamaýdyń qajeti joq, ispen dáleldeý kerek. Maǵan qatysty Qazaqstanda emes, halyqaralyq alańda «jap-jas qyz» degen pikir aıtyldy. Ondaı pikirlerge fılosofııalyq turǵydan qarap, jumys isteýdi jalǵastyra berý qajet. Mınıstr bolyp taǵaıyndalýym – men úshin úlken jaýapkershilik. Jastardyń eldiń damýyna úlesin qosa alatyndyǵynyń dáleli men kórsetkishi. Júktelgen mindetter men úmitti aqtaýǵa tyrysamyn.
Ómirde únemi bári jaqsy, oıdaǵydaı bola bermeıdi. Heıter, kórealmaýshylyq, negatıv bolyp turady. Bul jaıtqa da fılosofııalyq turǵydan qaraǵan jón. Eger teris pikirler men kórealmaýshylardyń ár sózine mán bersek, kómilip qalýǵa bolady. Mınıstr retinde maǵan artylǵan jaýapkershilik joǵary, sondyqtan kórealmaýshylarǵa ýaqyt joq», - dedi Zúlfııa Súleımenova Úkimet úıinde tilshilerdiń saýalyna jaýap bere turyp.
Sondaı-aq, jańa mınıstr otandyq ekologııaǵa qatysty máselelerdi sheshý jumysy jalǵasatynyn aıtty.
«Byltyr ekologııa vıtse-mınıstri bolǵanda biraz jumys istedik dep oılaımyn. Jýyrda BAQ ókilderimen, jalpy qoǵam ókilderimen taǵy jolyǵamyz degen oıdamyn. Ekologııa taqyrybyna kelsek, másele jınalyp qalǵan, keshendi ári kúrdeli. Olardy birer jyldyń ishinde sheshý múmkin emes. Degenmen, ekologııalyq máselelerdi sheshý baǵytyndaǵy jumys jalǵasa beredi», - deıdi ol.
Eske salsaq, 4 qańtarda Zúlfııa Súleımenova QR Ekologııa jáne tabıǵı resýrstar mınıstri laýazymyna taǵaıyndaldy.
Buǵan deıin Mádenıet jáne sport mınıstri Ashat Oralov bottarmen jumys isteýge qatysty pikir bildirgen edi.
Foto: t.me/Kzgovernment
