Qazaqstanda emdelýge tsıfrlyq vıza alý 48 elge qoljetimdi

ASTANA. KAZINFORM – Bıyl jyl basynan beri 1,5 myńǵa jýyq sheteldik elimizdiń medıtsınalyq mekemelerinde em aldy. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.

- Búginde Qazaqstanda emdelýge tsıfrlyq vıza alý («E-Visa») 48 elge qoljetimdi. Elimizde medıtsınalyq týrızm jyldan jylǵa damyp keledi. Mysaly 2025 jyldyń aǵymdaǵy kezeńinde respýblıkalyq medıtsınalyq mekemelerde 1 500-ge jýyq sheteldik azamat em alǵan (2024 jyldyń qorytyndysy boıynsha 1468 sheteldik azamat emdik kómek aldy). Medıtsınalyq týrızmdi damytý aıasynda 2025 jyly 13-14 qazanda «Qazaqstan densaýlyǵy: ınnovatsııa, qoljetimdilik, globalızatsııa» atty halyqaralyq konferentsııa men kórme ótti. Konferentsııaǵa 30 eldiń (AQSh, Qytaı Halyq Respýblıkasy, Ispanııa, Túrkııa, Ulybrıtanııa t.b.) elshilikteriniń 500 ókili men 13 eldiń satyp alýshylary qatysty (BAÁ, Úndistan, Germanııa, Qyrǵyzstan, Ózbekstan, Reseı t.b.). Konferentsııa aıasynda medıtsınalyq, farmatsevtıkalyq jáne týrıstik salalardyń jetistikterin kórsetýge arnalǵan kórmeler uıymdastyryldy. Bul otandyq medıtsınalyq uıymdardyń áleýeti, zamanaýı tehnologııalar men medıtsınalyq qyzmet eksportyndaǵy bastamalardy kórsetýge mańyzdy alań boldy, - dedi Úkimet basshysy jaýabynda.

Onyń málimetinshe, 2025 jyly 13-17 qazan aralyǵynda Ózbekstan Respýblıkasynda Qazaqstan medıtsınasy kúnderi ótip, profıldi ǵylymı ortalyqtar men jetekshi dárigerler Ózbekstan óńirlerinde (Buhara, Samarqand, Nókis, Ferǵana) medıtsınalyq uıymdar arasynda tájirıbe almasty.

- Budan basqa, qazirgi ýaqytta medıtsınalyq týrızm aıasynda medıtsınalyq qyzmet kórsetý saıasatyn jáne tártibin aıqyndaıtyn normalar qarastyrylǵan zań jobasy Májiliste qaralýda,- dedi Oljas Bektenov.

Aıta keteıik, Májilis depýtaty Nurgúl Taý Úkimet basshysyna joldaǵan saýalynda medıtsınalyq týrızm salasynda biryńǵaı operator qurýdy usynǵan edi.