Qazaqstanda elıtalyq tuqym úlesi 12%-ǵa jetti
ASTANA. KAZINFORM – Qazaqstanda aýyl sharýashylyǵynyń ónimdiligin arttyrý maqsatynda elıtalyq tuqymdardyń úlesi 12%-ǵa jetip, 2,2 mln tonna mıneraldy tyńaıtqysh qoldanyldy, dep habarlaıdy Aýyl sharýashylyǵy mınıstrligi.
Vedomstvonyń málimetinshe, ósimdik sharýashylyǵynyń tıimdiligin arttyrý, zamanaýı agrotehnologııalardy engizý jáne agrarlyq óndiristiń klımat ózgeristerine tózimdiligin nyǵaıtý jumystary jalǵasyp jatyr.
Negizgi sharalar Memleket basshysynyń aýyl sharýashylyǵynyń jalpy ónim kólemin eki ese arttyrý jónindegi tapsyrmasyna sáıkes ázirlengen 2024-2028 jyldarǵa arnalǵan jol kartasynda qamtylǵan.
Basym baǵyttardyń biri – egis alqaptarynyń qurylymyn ártaraptandyrý. Atap aıtqanda, joǵary tabysty daqyldardyń úlesin ulǵaıtý arqyly aýyl sharýashylyǵy jerlerin paıdalanýdyń ekonomıkalyq tıimdiligin arttyrý kózdelip otyr.
Bıyl elıtalyq tuqymdardyń úlesi josparlanǵan 11,6%-dan asyp, 12%-ǵa jetti. Mınıstrlik bul kórsetkishti odan ári arttyrý daqyldardyń ónimdiligi men qolaısyz aýa raıyna tózimdiligin kúsheıtetinin atap ótti.
– Taǵy bir mańyzdy mindet – mıneraldy tyńaıtqyshtardy qoldaný kólemin ulǵaıtý. Bıyl agrarshylar 2,2 mln tonna mıneraldy tyńaıtqysh engizdi. Bul ǵylymı negizdelgen qajettiliktiń 66%-yn quraıdy. Tyńaıtqyshtardy qoldaný kólemin odan ári arttyrý eginshilik tıimdiligin kóterip, aýyl sharýashylyǵy alqaptarynyń ónimdiligin jaqsartýǵa múmkindik beredi, – delingen mınıstrlik aqparatynda.
Sonymen qatar aýyl sharýashylyǵy tehnıkasyn jańartý jumystary júrgizilip jatyr. Bıyl mashına-traktor parkin jańartý deńgeıi 7%-ǵa jetken. Jyl sońyna deıin bul kórsetkishti 8%-ǵa jetkizý josparlanǵan.
Klımattyń ózgerýi men sý resýrstaryna túsetin júktemeniń artýyna baılanysty sý únemdeý tehnologııalaryn engizý aýqymy da keńeıtiledi.
Mınıstrliktiń málimetinshe, atalǵan sharalar ár gektardan alynatyn ónim kólemin turaqty arttyrýǵa, ónimniń ózindik qunyn tómendetýge jáne otandyq aýyl sharýashylyǵynyń básekege qabilettiligin nyǵaıtýǵa baǵyttalǵan.
Aıta keteıik, buǵan deıin aýyl sharýashylyǵy tehnıkasyn jańartýǵa arnalǵan jeńildikti lızıng baǵdarlamasynyń qarjylandyrý kólemi 2026 jyly 250 mlrd teńgeden 350 mlrd teńgege deıin ulǵaıtylǵany habarlanǵan bolatyn.
