Qazaqstanda elimizdiń eń úzdik jumys berýshisin anyqtaıtyn «Senim - 2010» atty baıqaý ótedi
ALMATY. Qazannyń 26-sy. QazAqparat /Názıra Eleýhan/ - Elimizde qarasha aıynyń 1-nen bastap Qazaqstannyń jumys berýshileri arasynda «Senim - 2010» atty baıqaýy bastalady.
Bul týraly búgin Almatyda ótken arnaıy baspasóz máslıhatynda habarlandy.
Baıqaýdy uıymdastyrýshylar - Qazaqstannyń HR-menedjerler qaýymdastyǵy, «Samuryq-Qazyna» Korporatıvti ýnıversıteti» jáne Áleýmettik-saıası zertteýler ınstıtýty (ÁSZI-Qazaqstan).
Baıqaýdyń maqsaty - óz qyzmetkerleriniń seniminen shyqqan kompanııalardy jáne QR-nyń jumysqa qabiletti azamattaryn ónegeli jumys berýshi retinde madaqtaý, sondaı-aq, HR-mádenıetti qalyptastyryp, osy baǵytta joǵarǵy standarttardy ornatyp, materıaldyq emes resýrstardyń damýy mańyzdylyǵyn túsinetin kompanııalardy yntalandyrý.
"Qazaqstan naryǵynda qyzmet kórsetetin jekemenshiktiń túrli úlgidegi, ár túrli saladaǵy uıymdary men shaǵyn jáne orta bıznes kásiporyndary baıqaýdyń qatysýshylary bola alady. Sondaı-aq, fılıaldar men kompanııanyń enshiles uıymdary Baıqaýǵa qatysý quqyǵyna ıe",- dedi «Senim 2010» jobasynyń jetekshisi Elena Protsenko. Onyń aıtýynsha, baıqaýdyń «Senim» dep atalýy is-sharanyń basty ıdeıasyn beıneleıdi. "Baıqaý Almaty jáne Astana qalalarymen qatar, Qazaqstannyń 14 aımaǵynda ótkiziletin bolady. Kimniń eń úzdik dep tanylatynyna aldyn-ala ótkiziletin áleýmettik zertteý jaýap bermek. Úsh myńnan asa adamnan suraq-jaýap alynatyn bolady. Baıqaý «Eń belseńdi jumys berýshi» (6 oryn) jáne «Eń úzdik HR-jobasy» (1 oryn) atalymdary boıynsha ótkiziledi", - dedi Elena Protsenko.
Qazaqstandyqtarǵa ár túrli suraqtar qoıylmaq - qyzmetkerler kompanııanyń daǵdarystan keıingi kezeńdegi áleýmettik saıasatyna qalaı qaraıdy, jumysshylar men jumys berýshiler arasynda senim saqtalyp qaldy ma, kompanııanyń ómirsheńdigine ujymnyń senimi qanshalyqty áser etedi, damý strategııasyn ázirleýde qyzmetkerlerdiń qatysýy qajet pe, qazaqstandyqtardyń eńbek shartyna qanshalyqty kóńili tolady, jumys berýshi-kompanııany tańdaýda eńbekaqy ǵana áser ete me, QR aýmaǵynda qaı kompanııa HR-brend ataǵyna laıyq. Uıymdastyrýshylardyń aıtýynsha, osy jáne ózge de suraqtardyń jaýaby memlekettiń áleýmettik ál-aýqatyn aıqyndaıtyn kórsetkishterdiń biri bolyp tabylady.
Baıqaýdyń nátıjeleri 2011 jyly aqpan aıynyń 24-25 kúnderi «Samuryq-Qazyna» AQ jáne «QazMunaıGaz» UK» AQ bastamasymen ótkiziletin VI Halyqaralyq adam resýrstaryn basqarý konferentsııasy barysynda málimdenbek.
