Qazaqstanda elevatorlardaǵy ónim saqtaý kólemi 1 mln tonnaǵa artady
ASTANA. KAZINFORM – Jańa elevatorlar salý men jańǵyrtýǵa jeńildetilgen qarjylandyrýǵa ótinimder qabyldaý bastaldy. Bul týraly Úkimet otyrysynda Aýyl sharýashylyǵy vıtse-mınıstri Azat Sultanov málim etti.
- Egis alqaptaryn ártaraptandyrý nátıjesinde burshaq jáne maıly daqyldar óniminiń kólemi aıtarlyqtaı óskeni belgili. Osyǵan baılanysty ár daqyldy bólek saqtaý qajettiligi týyndaıdy. Memleket basshysynyń tapsyrmasyna sáıkes sáýir aıynan bastap elevatorlar salý men jańǵyrtýǵa jeńildetilgen qarjylandyrýǵa ótinimder qabyldaý bastaldy. Osy tapsyrmany iske asyrý maqsatynda negizgi qarjylandyrý krıterııleri men astyq saqtaý nysandaryn salý jáne jańǵyrtý kórsetkishterin qamtıtyn Jol kartasy ázirlendi. Qarjylandyrý tolyq kólemde qamtamasyz etilgen jaǵdaıda, elevatorlardyń saqtaý qýatyn 1 mln tonnaǵa deıin ulǵaıtý josparlandy, - dedi A.Sultanov.
Onyń aıtýynsha, qazirgi ýaqytta egis jumystary jaqsy qarqynmen iske asyp keledi. Osy qarqyndy tómendetpeı, egis jumystaryn ońtaıly agrotehnıkalyq merzimde tolyq aıaqtaý qajet.
Budan buryn habarlanǵandaı, Aýyl sharýashylyǵy vıtse-mınıstri Azat Sultanov shegirtke zııankesterine qarsy hımııalyq óńdeý jumystary kórshi eldermen birlese júzege asatynyn aıtty.
