Qazaqstanda elektrosamokattarǵa nómir taǵý mindettelýi múmkin

ASTANA. KAZINFORM — Qazaqstanda samokattar men velosıpedterge memlekettik nómir taǵý usynysy talqylanyp jatyr.

Bul týraly QR Іshki ister mınıstriniń orynbasary Sanjar Ádilov málim etti.

Búgin Parlament Májilisindegi baspasóz máslıhatynda samokattarǵa qatysty talaptardy kúsheıtý múmkindigi jaıynda suraq qoıyldy.

- Biz Ádilet mınıstrligi janyndaǵy vedomstvoaralyq jumys tobynyń alańynda birqatar qosymsha túzetý daıyndap jatyrmyz. Atap aıtqanda, shetelde qoldanylatyn tájirıbeni engizý týraly usynys bar. Osy oraıda Shveıtsarııanyń tájirıbesin zerttedik, ıaǵnı ol jaqta memlekettik nómirler tek samokattarda ǵana emes, velosıpedterde de bar. Sondyqtan bul norma men usynys óte ózekti, - dedi S. Ádilov.

Onyń aıtýynsha, bul usynys qazir talqylanyp jatyr.

Buǵan deıin elektrosamokatpen júrý erejelerin kóbine jasóspirimder buzatynyn polıtsııa habarlaǵan bolatyn.

Jaqynda elektrosamokatshylarǵa qandaı tyıym salynatynyn jazǵan edik.