Qazaqstanda «Elektrondyq sertıfıkattaý» jáne «Qaýipti ónim» servısteri iske qosyldy

NUR-SULTAN. QazAqparat - QR Saýda mınıstrliginiń alqa otyrysynda vıtse-mınıstr Ásel Janasova iske qosylǵan pılottyq joba – elektrondyq sertıfıkattaý servısi týraly aıtyp berdi, dep habarlaıdy QazAqparat tilshisi.

Pılottyq jobanyń ózi tutynýshylar úshin eldiń ishki naryǵyndaǵy ónimniń, kórsetiletin qyzmetterdiń qaýipsizdigi men sapasyn arttyrýǵa baǵyttalǵan jáne 2021 jylǵy 12 sáýirde iske qosyldy.

Jobanyń negizgi maqsaty - ónimder men kórsetiletin qyzmetterdiń talaptarǵa sáıkestigine synaqtar júrgizý kezinde SAPANYŃ ashyqtyǵy men senimdiligin qamtamasyz etý.

Ásel Janasova atap ótkende, elektrondyq sertıfıkattaýǵa kóshý sertıfıkattaý protsesiniń ashyqtyǵyn qamtamasyz etýge, qujattardyń jalǵandyǵy men jasandylyǵyn boldyrmaýǵa, sondaı-aq akkredıttelgen uıymdardyń sertıfıkattar berý bóligindegi jumys sapasyn baqylaýǵa múmkindik beredi.

Tehnıkalyq retteý salasyn tsıfrlandyrý týraly aıta kele, vıtse-mınıstr ázirlengen «Qaýipti ónim» servısi týraly da aıtty.

Servıs Tehnıkalyq retteý jáne metrologııa komıteti tarapynan tehnıkalyq reglamentterdiń talaptaryna sáıkes kelmeıtin ónim týraly aqparattandyrý maqsatynda qurylǵan jáne ónimdi baqylaý protsesin tsıfrlandyrýǵa ári qaýipsiz emes ónimniń taralýyn jedel boldyrmaýǵa múmkindik beredi.

«Búgingi tańda memlekettik baqylaý/qadaǵalaý organdarynyń - QR DSM Sanıtarlyq-epıdemıologııalyq baqylaý komıteti men QR AShM Veterınarlyq baqylaý komıtetiniń toltyrýy úshin tıisti nysan pysyqtalýda» - dedi Á. Janasova.