Qazaqstanda elektrondyq kommertsııany damytýdyń jol kartasy ázirlenedi
NUR-SULTAN. QazAqparat - Qazaqstanda 2025 jylǵa deıingi elektrondyq kommertsııany damytýdyń jol kartasyn ázirleý kerek. Búgin Úkimet otyrysynda QR Premer-Mınıstri Asqar Mamın osyndaı tapsyrma júktedi, dep habarlaıdy QazAqparat tilshisi.
«Qazposhta» AQ jelisi boıynsha 2025 jylǵa deıin barlyq iri qalalarda kólik-logıstıkalyq ortalyqtaryn iske qosý jumystaryn jalǵastyrý qajet. Bul jumysqa otandyq jáne sheteldik ınvestorlardy, sonyń ishinde memlekettik-jekeshelik áriptestikti qoldaný arqyly tartý kerek. Sondaı-aq Qorǵasta qazir jumys istep turǵan ınfraqurylymdy paıdalaný múmkindigin qarastyrǵan jón», - dedi Úkimet basshysy.
Ol qazirgi kezde álemde iri saýda júıeleri jabylyp, onyń ornyna elektrondyq kommertsııa qoımalary ashylyp jatqanyn aıtty.
«Osy rette aldaǵy ýaqytta logıstıkalyq ortalyqtar naryq damýynyń negizgi baǵytyna aınalýy múmkin. Elektrondyq kommertsııany serpindi damytýdyń asa mańyzdy elementteriniń biri kadrlardy daıyndaý bolyp sanalady. Jumys oryndarynyń josparly ósýine baılanysty 2025 jyly 280 myńnan astam jańa jumys orny ashylady. Osyny eskerip, «Qazposhta» AQ jáne logıstıkalyq kompanııalar kolledjder men bilim beretin basqa mekemeler arasynda mamandar daıarlaýdy óz qaramaǵyna alý máselesin qarastyrý qajet», - dedi ol.
Premer-Mınıstr elektrondyq saýda-sattyq ekonomıkanyń damýyna úlken serpin beretin áleýeti joǵary ekendigin basa aıtty.
«Sondyqtan osy maqsatta tranzıttik múmkindikterdi jáne kólik-logıstıka ınfraqurylymyn tıimdi paıdalaný qajet. Osyǵan oraı, Ulttyq ekonomıka mınıstrligine múddeli memlekettik organdarmen jáne uıymdarmen birge elektrondyq kommertsııany damytý jónindegi 2025 jylǵa deıingi jol kartasyn bir aıdyń ishinde ázirleýdi tapsyramyn. Ony Úkimet deńgeıinde bekitetin bolamyz», - dedi Asqar Mamın.
