Qazaqstanda elektrondy temeki men energetıkalyq sýsyn jastarǵa satylmaýy múmkin

ATYRAÝ. QazAqparat - Biz búkil qoǵam bolyp esirtkige qarsy tabandy túrde kúresýge tıispiz. Bul pikirdi Memleket basshysy atyraýlyqtarmen kezdesý jıynynda aıtty, dep habarlaıdy QazAqparat.

«Bul urpaqtyń densaýlyǵyn saqtaý úshin óte mańyzdy. Jastardyń jat qylyqqa boı aldyrýyna jol bermeýimiz kerek.

Qazir eresekterdiń ermegine aınalǵan elektrondy temekige oqýshylar da áýestenip barady. Mundaı temekini balalar dúkennen esh kedergisiz satyp alady. Bul – qaýipti jaǵdaı», - dedi Qasym-Jomart Toqaev.

Ol bizde alkogol ónimderin 21 jasqa tolmaǵan azamattarǵa satýǵa tyıym salynǵanyn eske saldy. Biraq, bul talap is júzinde oryndala bermeıdi. Quzyrly organdar baqylaýdy kúsheıtýi kerek.

«Qoǵamda energetıkalyq sýsyndardy jastarǵa satýǵa tyıym salý qajettigi jıi aıtylady. Úkimet bul máseleni muqııat zerdelep, naqty sheshim qabyldaýy kerek.

Muhtar Áýezovtiń«El bolamyn deseń, besigińdi túze» degen sózi bar. Biz urpaqtyń densaýlyǵyn jáne tárbıesin búgin oılamasaq, erteń kesh bolýy múmkin», - dedi Memleket basshysy.