Qazaqstanda elektrondy saýda jasaıtyn kásipkerlerge salyqtyq jeńildik berý usynyldy
«Biraq elektrondyq saýda úlesiniń ósýine qaramastan bizde áli kúnge deıin onlaın-jelige tolyq kóshýde tosqaýyl bolatyn kedergiler bar. Kóleńkeli ekonomıkanyń joǵary úlesi, bankaralyq tólemder, ekvaırıng boıynsha joǵary komıssııa, shaǵyn orta kásiporyndardyń daıyn emestigi jáne taýarlardy ýaqtyly jetkize almaý sııaqty problemalar. Elektrondyq saýdanyń ósý qarqynyn qoldaý úshin normatıvtik jáne tehnıkalyq qamtamasyz etýdi odan ári jetildirý qajet», - dedi Baqyt Sultanov Úkimet otyrysynda.
Onyń aıtýynsha birinshiden bastaýshy jáne tájirıbeli kásipkerlerdi ınternet-platformalarda ilgerletý boıynsha tikeleı qoldaý kórsetilgen
«Búgin biz qazaqstandyq kompanııalardy Alıbaba, Amazon, ıAndeks, Ozon, Shopify sııaqty halyqaralyq onlaın saýda alańdaryna shyǵarý boıynsha memleketter arasyndaǵy áriptestikti pysyqtap jatyrmyz. Mysaly, Alibaba platformasyna «Altyn jetkizýshi» retinde 50 kompanııa irikteldi. Bul premıým mártebesi jahandyq aýdıtorııaǵa qol jetkizýdi, marketıngtiń ishinde keshendi ilgerletý múmkindigin qamtamasyz etedi. Ekinshiden, pandemııa jaǵdaıynda jedel qarqynmen damyp jatqan qazaqstandyq sandyq saýda alańdaryn qoldaýǵa baǵyttalǵan sharalar qabyldanýda. Búgin de naryqta 13 platforma jumys isteıdi. Kaspi, chocofamily, technodom, mechta jáne marketıngtik ónimder men qyzmetterdiń 20 sanatyna ıe taǵy da basqa platfomalar. Mysaly, ulttyq kóshbasshy kaspi dúken tapsyrystarynyń somasy 2020 jyldyń birinshi jartyjyldyǵynda ótken jyldyń uqsas kezeńimen salystyrǵanda 2 ese ósti», - dedi ol.
Baqyt Sultanov elektrondyq saýdany odan ári damytý maqsatynda odan túsken kirister jyldyq jıyntyq tabystyń keminde 40%-yn quraǵan jaǵdaıda salyq kodeksindegi jeke kásipkerler úshin korporatıvtik tabys salyǵy men jeke tabys salyǵyn tóleýden bosatý normasy jónindegi ózgeristerdi qoldaýdy surady.
«Qolma-qol aqshasyz tólemderdi paıdalanýdy yntalandyrý úshin Ulttyq bankpen birlesip bankaralyq aýdarymdar komıssııasyn tómendetý, ekvaırıng máselelerin pysyqtaý, sondaı-aq jańa banktik emes tólem júıelerin damytý talap etiledi», - dedi ol.
