Qazaqstanda elektrondy oqýlyqtardy 1 myń oqýshy qoldanady

ALMATY. QazAqparat - Aldaǵy jaqyn ýaqytta Qazaqstannyń barlyq mektepterinde elektrondy oqýlyq formaty engiziledi. Jańartylǵan mazmundaǵy oqýlyqtarmen qazirdiń ózinde 1 myńǵa jýyq oqýshy bilim alyp jatyr, dep habarlaıdy QazAqparat tilshisi.

«Almatykitap» baspasy elektrondy oqýlyqtardy 2018 jyldyń 1 qyrkúıeginen bastap engize bastady.

Pılottyq joba boıynsha eldiń 5 óńirindegi 11 mektep qatysyp jatyr. Atap aıtqanda, 1 myń oqýshy men 350 ustaz elektrondy oqýlyqty qoldaný ústinde.

Elektrondy oqýlyqtardy qoldana otyryp, alǵashqy ashyq sabaq Astana qalasyndaǵy № 85 mektepte ótken bolatyn.

«Men óz smartfonym arqyly Opiq.kz qoldanyp kele jatqanyma bir jyl boldy. Onlaın platforma kez kelgen ınternet jelisi ustaıtyn jerde ashyla beredi. Endi oqýshylar aýyr sómke tasyp júrmeıdi. Barlyq oqýshylar kóshse jaqsy bolar edi», - dedi Astanadaǵy №62 mektep lıtseıiniń oqýshysy Damır Sarmanov.

Opiq.kz platformasynda 1, 2, 3, 5, 6 jáne 8-synyptardyń oqýlyqtary bar. Bul oqýlyqtarda ınteraktıvti mýltımedıalyq materıaldar kóp ornalasqan.

«Joba Tsıfrlandyrý baǵdarlamasyn júzege asyrý aıasynda jasaldy. Úıge jekelegen, toptyq tapsyrma bere alamyz. Úı tapsyrmalaryn oryndaý óte tıimdi. Informatıka, matematıka, geografııa sııaqty pánder qosylǵan», - dedi №62 mektep muǵalimi Alma Turǵanbekova.

Aıta ketý kerek, bul baǵdarlama álemniń birneshe elderinde jumys jasaıdy.

Qazaqstandaǵy baǵdarlama estondyq áriptesterdiń ozyq tájirıbesine súıene ázirlengen.