Qazaqstanda elektrondy eńbek bırjasy qurylýda
ASTANA. QazAqparat - Elektrondy eńbek bırjasy qyrkúıek aıynda jumys isteı bastaıdy.
Bul týraly búgin Eńbek jáne halyqty áleýmettik qorǵaý vıtse-mınıstri Birjan Nurymbetov málim etti, dep habarlaıdy QazAqparat.
«Onlaın-platforma qyrkúıekte iske qosylyp, júıe tolyǵymen jyl sońyna deıin paıdalanýǵa beriledi dep josparlap otyrmyz», - dedi ol Astanada ótken baspasóz máslıhatynda.
Elektrondy eńbek bırjasy jumys izdeýshiler men jumys berýshilerdi, jumyspen qamtý ortalyqtary men agenttikterin bir onlaın-platformaǵa biriktirmek. Oǵan túsken árbir túıindeme jumyspen qamtý ortalyǵynda tirkeledi.
«Bizdińshe, eńbek bırjasy jumys isteýi tıis. Bizde qazir enbek.kz portaly bar. Ol úlken tanymaldylyqqa ıe, mıllıonnan astam ınternet paıdalanýshy kirgen. Jumysqa qatysty izdeýge de eń kóp túsetini osy portal. Sonymen qatar «Eńbek naryǵy» atty júıe bar. Jumys izdeýshiler men jumys berýshilerdi, jumyspen qamtý ortalyqtary men agenttikterin bir onlaın-platformaǵa qosý úshin ony osy portalmen biriktiremiz», - dedi vıtse-mınıstr.
Onyń aıtýynsha, qazirgi kezde elimizde 60-tan astam jumyspen qamtý agenttikteri jumys isteıdi. Tıisti bazany jınaqtaý úshin olardyń málimetteri de qoldanylmaq.
«Onda bizdiń ınterfeıs óte qarapaıym bolady. Jumys berýshiler bos jumys oryndary týraly suranystary men jumys izdeýshilerdiń túıindemeleri jarııalanady. Onlaın-platformada jeke kabınet, jumys berýshiler men izdeýshiler arasynda baılanys ornatýǵa jáne sol jerden onlaın-áńgimelesýler júrgizýge múmkindik beretin servıster bolady», - dedi Nurymbetov.
