Qazaqstanda elektrondy aqshamen jasalatyn operatsııalarǵa lımıtter belgilenedi

NUR-SULTAN. QazAqparat - 2020 jylǵy 17 shildede «Qazaqstan Respýblıkasynyń keıbir zańnamalyq aktilerine shetel valıýtasyndaǵy ıpotekalyq qaryzdar, kórsetiletin tólem qyzmetteri naryǵynyń sýbektilerin retteýdi jetildirý, jalpyǵa birdeı deklaratsııalaý jáne ekonomıkalyq ósýdi qalpyna keltirý máseleleri boıynsha ózgerister men tolyqtyrýlar engizý týraly» Zań kúshine enedi, dep habarlaıdy QazAqparat.

QR Ulttyq bank baspasóz qyzmetiniń málimetinshe, Zań «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýynda belgilengen Memleket basshysy Qasym-Jomart Toqaevtyń tapsyrmalaryn oryndaý aıasynda ázirlendi.

Qujat aqshany jylystatý, elden kapıtaldy shyǵarý jáne kóleńkeli ekonomıkaǵa qarsy is-qımyl táýekelderin tómendetý úshin banktik emes qarjy uıymdarynyń qyzmetin retteýdi jetildirýge baǵyttalǵan normalardy qamtıdy.

Zań Ulttyq banktiń tólem uıymdarynyń, tólem júıeleriniń qyzmetin retteýdi jetildirý jáne banktik emes tólem uıymdarynyń servısterin zańsyz operatsııalar úshin paıdalanýdy boldyrmaý bóliginde ókilettikterin bekitedi. Atap aıtqanda: elektrondyq ámııandardyń sáıkestendirilmegen paıdalanýshylary arasynda aýdarymdarǵa tyıym salý engiziledi; elektrondyq aqshamen jasalatyn operatsııalarǵa ár túrli lımıtter belgilenedi; zańsyz operatsııalarǵa qarsy is-áreket maqsatynda tólem júıeleriniń operatorlary úshin mindetter belgilenedi; dara kásipkerler men zańdy tulǵalarǵa ózderiniń tólem operatsııalaryna qyzmet kórsetý úshin elektrondyq ámııandardy paıdalaný múmkindigi beriledi.

Sonymen qatar Zań Ulttyq banktiń kásipkerlik sýbektileriniń banktik shottarynan qolma-qol aqshany alýdyń shekti mólsherin jáne belgilengen shekti mólsherden artyq qolma-qol aqshany alý tártibin retteý jónindegi ókilettikterin bekitedi.