Qazaqstanda elektrondyq saýdany damytý jospary qaıta jańartylady

ASTANA. KAZINFORM – Úkimet basshysy Oljas Bektenov elektrondyq saýdany damytýdaǵy 2027 jylǵa deıingi jospardy qaıta qaraýdy tapsyrdy. 

- Saýdanyń damýy kólik, logıstıka jáne qoıma ınfraqurylymyna tikeleı baılanysty. Saýda jáne ıntegratsııa mınıstrligi múddeli memlekettik organdarmen jáne bıznes qoǵamdastyqpen birlesip, naýryz aıynyń sońyna deıin el ishinde, sol sııaqty halyqaralyq deńgeıde taýarlardy jetkizýdiń tıimdi tizbegin qalyptastyrýy qajet, - dedi Oljas Bektenov Úkimet otyrysynda.

Sondaı-aq, Premer-mınıstr múddeli memlekettik organdardyń «Tsıfrlyq Qazaqstan» qaýymdastyǵymen birlesip, elektrondyq kommertsııany damytýdy memlekettik qoldaýdyń qosymsha sharalaryn ázirleýdi tapsyrdy.

- Elektrondyq saýdany damytýdyń 2027-shi jylǵa deıingi jospary qabyldanǵan bolatyn. Alaıda, ony otandyq bıznestiń usynystaryn jáne marketpleıstermen jumys tájirıbesin eskere otyryp jańartý qajettigi týyndap otyr. Bul jumysty naýryzdyń sońyna deıin aıaqtaý qajet, - deıdi ol.

Buǵan deıin Oljas Bektenov marketpleısterdegi taýarlardyń sapasyna qatysty suraqtyń kóptigin aıtqan edi. 

Aıta keteıik, elimizde bazarlar men dúkenderdiń qyzmetin tsıfrlandyrý josparlanyp otyr.