Qazaqstanda elektrondyq saýda operatorlary qashan jumysyn bastaıdy
ASTANA. KAZINFORM — AliExpress, Temu, iHerb jáne basqa da sheteldik marketpleıster arqyly jasalatyn transshekaralyq ınternet-satyp alýlardy resimdeý tártibin ózgertetin elektrondyq saýda operatorlary ınstıtýtyn iske qosý keıinge shegerildi.
Buǵan deıin jańa erejeler 2026 jyldyń ekinshi jartysynda kúshine enedi dep josparlanǵan bolatyn. Alaıda olardy iske qosý 2027 jyldyń basyna shegerildi. Bul týraly QR Qarjy mınıstrligi Memlekettik kirister komıtetiniń Memlekettik kirister komıteti Kedendik ádisnama basqarmasynyń bas sarapshysy Marhabat Omarova málimdedi.
Onyń aıtýynsha, pılottyq joba Eýrazııalyq ekonomıkalyq odaqtyń (EAEO) jáne Qazaqstannyń elektrondyq saýda salasyndaǵy jańa keden zańnamasy kúshine engen kezde aıaqtalady.
— Jańa retteýdiń kúshine ený kúni ázirshe naqty belgilengen joq. Boljam boıynsha 2027 jyldyń basy. Elektrondyq saýda salasyndaǵy merzimderdiń 2027 jylǵa shegerilýine EAEO-ǵa múshe memleketterdiń barlyǵy birdeı ulttyq zańnamalaryna tıisti ózgerister engizý jáne aqparattyq júıelerdi ázirleý jumystaryn aıaqtamaǵany sebep bolyp otyr, — dedi ol.
Sarapshy jańa normalar kúshine engennen keıin elektrondyq saýda operatorlary óz qyzmetin resmı túrde bastaı alatynyn atap ótti.
Sonymen qatar Qazaqstan zańnamasyna qajetti ózgeristerdiń barlyǵy qabyldanǵan.
— Qazaqstan Respýblıkasynyń 2026 jylǵy 2 shildedegi № 333-VIII QRZ Zańymen «Qazaqstan Respýblıkasyndaǵy kedendik retteý týraly» Kodekske elektrondyq saýda salasyna qatysty ózgerister men tolyqtyrýlar engizildi. Onyń ishinde elektrondyq saýda operatorlarynyń tizilimine engizilý talaptary aıqyndaldy, — dep túsindirdi Marhabat Omarova.
Jańa júıeni engizý úshin ótpeli kezeń qarastyrylǵan. Osy ýaqyt ishinde elektrondyq saýda taýarlaryn kedendik resimdeýdi keden ókilderi júzege asyra alady.
— Keden ókilderi elektrondyq saýda operatorlarynyń tizilimine alǵashqy operator engizilgen kúnnen bastap alty aı boıy elektrondyq saýda taýarlaryn resimdeı alady. Osy merzim aıaqtalǵannan keıin elektrondyq saýda taýarlaryn kedendik deklaratsııalaý tek elektrondyq saýda operatorlary arqyly júzege asyrylady, — dep tolyqtyrdy Memlekettik kirister komıtetiniń ókili.
Buǵan deıin Memlekettik kirester komıteti qandaı marketpleısterge jańa kedendik talap qoıylmaıtynyn aıtty.
