Qazaqstanda elektrondy saýda 14% ósti

ASTANA. KAZINFORM – Saýda jáne ıntegratsııa mınıstri Arman Shaqqalıev saýdanyń josparly kórsetkishterine qol jetkizý boıynsha júrgizilip jatqan jumystar týraly baıandady.

Mınıstrdiń aıtýynsha, 9 aıda saýda salasynyń naqty kólem ındeksi 108,8% boldy. Nomınaldy túrde saýda kólemi 52,8 trln teńge bolyp, ótken jyldyń sáıkes kezeńimen salystyrǵanda 14,5% ósim kórsetti.

– Mundaı ósim eldiń barlyq óńirde baıqalady. Ásirese saýda ósimine eń kóp úles qosqan óńirler — Almaty, Astana, Shymkent qalalary men Atyraý jáne Qaraǵandy oblystary. Atalǵan bes óńirdiń úlesine jalpy saýda kóleminiń 71,3% nemese 37,6 trln teńge tıesili, – dedi A.Shaqqalıev.

Kóterme saýda kólemi 35 trln teńgeden asyp, ótken jyldyń sáıkes kezeńimen salystyrǵanda 9,6% artty. Negizgi ósimge shıkizattyq emes tutyný taýarlary men óndiristik-tehnıkalyq maqsattaǵy taýarlar úles qosqan. Bulardyń úlesi shamamen 82% quraıdy. Qyrkúıek aıynda shıki munaı men tabıǵı gazdy ótkizý kólemi azaıǵan.

Bólshek saýda da turaqty ósim kórsetip otyr. Saýda kásiporyndary arqyly satý 6,7% ósti, jeke kásipkerler arqyly, onyń ishinde bazarlarda jumys isteıtinderdi qosqanda 8,1% astam deńgeıinde qalyptasty. Óńirler bólinisinde bólshek saýda aınalymy boıynsha alǵashqy úshtikke Almaty (32,8%), Astana (14%) jáne Qaraǵandy oblysy (7,3%) kirdi, – dedi Saýda mınıstri.

– Sonymen birge, bólshek saýda aınalymynyń mańyzdy draıverleriniń biri – elektrondy saýda bolyp otyr. Jedel baǵalaý derekterine sáıkes, osy jyldyń 9 aıynda onlaın-satylym kólemi shamamen 2,7 trln teńge boldy, bul ótken jyldyń sáıkes kezeńimen salystyrǵanda 14% joǵary, – dedi spıker.

Úkimet otyrysynda 2025 jylǵy qańtar-qyrkúıek aılaryndaǵy áleýmettik-ekonomıkalyq damý qorytyndylary men respýblıkalyq bıýdjettiń atqarylý barysy talqylanyp jatyr.