Qazaqstanda elektromobılge qyzyǵýshylyq qandaı
NUR-SULTAN. QazAqparat – 2020 jylǵy qańtarda Qazaqstanda 110 myńnan astam avtokólik tirkeýge qoıyldy. Bul týraly «QazAvtoÓnerkásip» avtokólik salasyndaǵy kásiporyndar odaǵy málim etti, dep habarlaıdy QazAqparat.
«Esepti kezeńde ákimshilik polıtsııa organdary 110 845 avtokólikti tirkeýge qoıdy. Atalǵan kórsetkish ótken jyldyń sáıkes kezeńinen 1,6 paıyzǵa artyq. Onyń ishinde 103 797-si ekinshi ret tirkelgender úlesinde, ıaǵnı bir adamnan ekinshi adamnyń atyna aýystyrylǵan kólikter sanatyna jatqyzyldy. Bir jyl burynǵy deńgeımen salystyrǵanda ósim 0,9 paıyz boldy. Al alǵash ret tirkelgen kólik quraldarynyń sany 7 048-di qurady. Ol byltyrǵa qaraǵanda, 13,2 paıyzǵa joǵary», - dep atap kórsetilgen taratylǵan málimette.
Bıylǵy qańtarda Qazaqstan aýmaǵynda eki elektromobıl tirkelgen eken.
«QazAvtoÓnerkásiptiń» habarlaýynsha, esepti kezeńde qaıta tirkelgen kólikterdiń úshten ekisinen astamyn (69 paıyzy) paıdalaný merzimi 10 jyldan asqan kólikter qamtyǵan.
Onyń ishinde 20 jyldan asqandardyń úlesi 44 693 myń (43,1 paıyz) bolsa, 11-den 20 jylǵa deıingiler 26 paıyzdy (26 943 kólik) qurady. Al 4-ten 7 jylǵa deıin – 17 468 (16,8 paıyz), 8-den 10 jylǵa deıin – 10 088 (9,7 paıyz), 1-den 3 jylǵa deıingi kólikter sany 4 555-ke jetti. Sonymen qatar, paıdalaný merzimi 1 jylǵa jetpegen kólikterdiń úlesi 0,05 paıyz (50 avtomobıl) boldy.
