Qazaqstanda elektromobılderge suranys joq - «Qazavtoóndiris» basshysy
NUR-SULTAN. QazAqparat - Qazaqstanda elektromobılderge suranys bolmaı otyr. Bul týraly OKQ-da ótken baspasóz máslıhatynda «Qazavtoóndiris» Qazaqstannyń avtomobıl salasyndaǵy kásiporyndar odaǵy» ZTB dırektorlar keńesiniń tóraǵasy Oleg Alferov aıtty, dep habarlaıdy QazAqparat tilshisi.
«Bul máselege qatysty men eki ǵana kórsetkishti keltireıin. Osy jyldyń basynan beri Qazaqstanda 4 elektromobıl ǵana tirkeldi. Al ótken jyldyń dál osyndaı kezeńinde alty elektr kóligi ǵana qurastyrylǵan bolatyn. Mine, týyndaǵan suraqqa beriletin jaýap ta osy. Avtoóndirýshiler naryqta usynatyn baǵa boıynsha kóliktiń bul sanatyna degen suranys joq dese de bolady. Suranys bolmaǵannan keıin ony óndirý jaǵynan qajettilik te týyndamaıdy. Bul rette biz atalmysh kólikterdi quraıtyndaı ınfraqurylym joq deı almaımyz. «ROP» operatory zarıadty ınfraqurylymdy damytýǵa barynsha kúsh salýda. Alaıda kópshilik kútip, elektr kólikterdi quraý ınfraqurylymy paıda bolǵanymen, bul qadam suranys jaǵynan eshqandaı oń dınamıka kórsete almady», - deıdi Oleg Alferov.
Eske sala ketsek, Qazaqstanda elektromobılderge degen suranystyń joqtyǵy eki jyl buryn da habarlanǵan bolatyn.
«Qazaqstandyq avtokólik óndirýshiler Óskemen jáne Qostanaı qalalarynda 2014 jyldan beri elektromobılder shyǵarýdy qolǵa alǵan. Álbette, bul kóligi dástúrli kólik óndirý salasyn almastyrýdyń jalǵyz joly emes, sýtegi otyny arqyly júretin kólikterge álemdik elder mańyz berip keledi. Biraq, búgingi qazaqstandyq naryqqa turmystyq rozetka arqyly qosylatyn gıbrıdti avtokólikter qyzyqty. Bul avtokólikterdiń baǵasy elektromobılderden góri áldeqalaı arzanyraq. Bizge qazaqstandyq avtoóndirýshiler óz kásiporyndarynda gıbrıdti avtokólikterdi óndirýge qyzyǵýshylyq tanytyp jatqanyn habarlady», - degen edi eki jyl buryn Oleg Alferov.
