Qazaqstanda elektrenergııanyń profıtsıti bolady - Energetıka mınıstrligi
NUR-SULTAN. QazAqparat - QR Energetıka mınıstri Qanat Bozymbaev otandyq energetıka salasynyń damý bolashaǵy týraly aıtyp berdi, dep habarlaıdy QazAqparat tilshisi.
Mınıstrdiń sózine qaraǵanda, respýblıka boıynsha ár túrli menshikke jatatyn 138 elektr stansasy bar. Olardyń jalpy elektr qýaty 21 902 Megavatty quraıdy. Sońǵy bes jylda jylý elektr stansalary men balamaly energııa kózderiniń qýaty artyp keledi. 2013 jylmen salystyrǵanda stansalardyń qýaty 2 470 Megavattqa nemese 15 protsentke ulǵaıdy. "Qazirgi kezde elimizde energııa júıesiniń múmkindigi joǵary. Tipti, tutynýdyń maksımaldy júktemesin kótere alady. Mysaly, byltyr 25 jeltoqsanda maksımaldy tutyný kólemi tirkelgen bolatyn. Onyń qýaty 14 823 Megavatty qurady. Al qoldanystaǵy qýattyń kólemi - 18 895 Megavatt. Demek, maksımaldy tutyný kezeńinde shamamen 4 000 Megavatt kóleminde qosymsha qor bar degen sóz", - dedi Q.Bozymbaev búgin azamattyq qoǵam ókilderimen bolǵan kezdesýde. 
Onyń sózine qaraǵanda, kómirdi jaǵatyn elektr stansalardyń úlesi 70 protsentti quraıdy. Gazben isteıtinder - 20 protsent, gıdrostansalar - 9 protsent, al balamaly energııa kózderi -1,3 protsent.
"Bıyl biz energııa balansyna arnalǵan jeti jyldyq boljamdy bekitken bolatynbyz. Oǵan sáıkes, 2025 jylǵa deıin Qazaqstanda elektr energııanyń profıtsıti bolady. Sondyqtan jańa nysandar salynsa, tek eski nysandardyń ornyna ǵana paıdalanýǵa beriledi. 2025 jylda elektr qýatyna degen suranys 18 260 Megavatt bolady degen boljam bar. Onyń syrtynda qosymsha rezerv bar. Sondyqtan shamamen 2 000 Megavattyq rezevti eseptegende 2025 jylǵa qaraı elimizde elektr energııa artyǵymen óndiriledi", - dep atap kórsetti Q.Bozymbaev.
Aıta keteıik, búgingi sharada mınıstr Eýrazııalyq ekonomıkalyq odaqta ortaq energetıkalyq naryqty qurýǵa arnalǵan xattamanyń rásimdeletinin málimdedi. Atalǵan shara EAEO týraly kelisimsharttyń bes jyldyǵyna oraı uıymdastyrylady. "Hattama naryqty qurý kezeńderin retteıtin bolady. Negizi, atalǵan qujattyń keıbir tarmaqtary boıynsha áli kúnge deıin qyzý talqylaý júrip jatyr. Máselen, Qazaqstan men Reseıdiń arasynda birqatar máseleler boldy. Degenmen, biz onyń bárin rettep aldyq. Sosyn eksport pen ımportpen aınalysatyn arnaıy uıymdy qurýǵa qatysty mańyzdy bir másele týyndady. Qazaqstanda kez kelgen kompanııa ruqsat alyp, energııany ekspotqa shyǵara alady, ımport jasaýǵa da bolady. Al Reseıde ondaı jumyspen arnaıy uıymdar aınalysady. Osynyń úlgisinde árbir memlekette arnaıy uıymdy qurý máselesi kóterilgen bolatyn. Biraq biz óz pozıtsııamyzdy qorǵaı aldyq. Eksport pen ımportty monopolızatsııalaýdyń qajeti joq dep sanaımyz", - deıdi Q.Bozymbaev.
Budan bólek, mınıstr "Saryarqa" qubyrymen keletin gazdy úıge deıin jetkizý sharalary týraly aıtyp berdi.
